Қазақстан Республикасының Премьер-министрі Олжас Бектенов Алматыда өткен Еуразиялық үкіметаралық кеңес (ЕҮАК) отырысында Еуразиялық экономикалық одақ (ЕАЭО) елдері үкіметтерінің басшыларымен өзара ынтымақтастықты нығайту мәселелерін талқылады. Жиында кедергісіз сауда, қолайлы бизнес-орта қалыптастыру және туризмді дамыту мәселелері қаралды, деп хабарлайды aqshamnews.kz
Отырысқа ЕАЭО елдерінің жоғары лауазымды өкілдері, оның ішінде Беларусь, Қырғызстан, Ресей, Армения, Иран, Өзбекстан және Әзербайжан үкімет басшылары, сондай-ақ Еуразиялық экономикалық комиссияның (ЕЭК) төрағасы Бақытжан Сағынтаев қатысты.Олжас Бектенов өз сөзінде ЕАЭО аясындағы сауда қатынастары мен экономикалық интеграцияның маңыздылығына тоқталды.
«Қазақстан Президенті Қасым-Жомарт Тоқаев Еуразиялық экономикалық одақтың экономикалық интеграция және өзара сауданы дамыту алаңы ретіндегі тиімділігін атап өтті. Бүгінде сыртқы өзгерістерге икемді бейімделу мүмкіндігі – экономикалық бәсекеге қабілеттіліктің басты факторы», – деді ҚР Премьер-министрі.
Қазақстан тарапы сауда қатынастарындағы кедергілерді жою және реттеуші ортадағы кемшіліктерді жоюға басымдық берді. Сонымен қатар, ЕАЭО елдері арасындағы бизнесті дамыту үшін халықаралық шарттарға нақты әсерді бағалау механизмін кеңейту ұсынылды.
Жиында ЕАЭО елдері арасындағы туризмді дамыту мәселесі де көтерілді. Одақ елдеріндегі танымал туристік бағыттар мен көрікті жерлер туралы бірыңғай ақпараттық платформа құру бастамасы ұсынылды.
Отырыс соңында ЕАЭО елдерінің экономикалық әлеуетін нығайтуға, кәсіпкерлік ахуалды жақсартуға және бірлескен жобаларды жүзеге асыруға бағытталған бірқатар маңызды құжаттарға қол қойылды.