Мәдениет және спорт министрлігі жанындағы Республикалық ономастика комиссиясы жалпы саны 606 ұсынысты қараған.
Өткен жылы 68 елді мекен мен 572 құрамдас бөліктің атауы өзгертілді. Мәселен, Ақмола облысы бойынша Южная көшесі Сәбит Мұқанов, Буденный көшесі Бауыржан Момышұлы, Ленин көшесі Абылай хан есімдерімен қайта аталды, деп хабарлайды Almaty-akshamy.kz.
Мәдениет және спорт министрлігі Мәдениет комитетінің ақпараты бойынша 2022 жылы Республикалық ономастика комиссиясы 606 ұсынысты қараған.
«Бұдан бөлек, былтыр Мемлекет басшысының Жолдауында көтерілген еліміздің әкімшілік-аумақтық құрылымын жетілдіру бойынша берілген тапсырмасын орындау мақсатында жаңадан құрылған үш облысқа Абай, Жетісу, Ұлытау атаулары берілді. Ал Қапшағай қаласы – Қонаев қаласы болып қайта аталды. Айта кету керек, облыс атаулары тек мемлекеттік тілде бекітілді. Мысалы, Абай облысы - область Абай, Ұлытау облысы - область Ұлытау, Жетісу облысы - область Жетісу. Сондай-ақ Ахмет Байтұрсынұлының 150 жылдық мерейтойына орай Қостанай халықаралық әуежайына ұлт ұстазының есімі берілді», – деді Мәдениет және спорт министрлігі Ономастика басқармасының басшысы Елерке Төрехан.