Отандасымыз финалда өзінен физикалық әлеуеті жоғары ирандық Айназ Насириден жеңіліп қалды.
Бұл жекпе-жекте Нұрайға өте қиын болатыны айдан анық еді. Қарсылас өте тәжірибиелі, денесі мығым. Десе Нұрай бар жігерін жұмсады, деп хабарлайды aqshamnews.kz.
Қазынабек ақтық сынға дейін Испания, Бельгия, Мексика, жартылай финалда Канада спортшысын ұтты. Нұрайдың сіңлісі Тоғжан Қазынабек Чхунчхондағы басты бәсекеге кетті. Ол соңғы жарыс күні сынға түседі.
Нұрай түрлі жас санатында 3 рет Қазақстан чемпионатында топ жарған. Ол қыздар арасында әлем чемпионатының финалына шыққан 2-қазақ таеквондошысы. Осыдан 2 жыл бұрын алғаш рет Айдана Сүндетбай ақтық сынға шығып, қарсыласына есе жіберген. Әзірге қыздарымыз әлем чемпионатында алтын ала алмай келе жатыр.
Осындай деректерді трансляция ұйымдастырып, эфир кезінде бәрімізге жеткізіп отырған таеквондодан ең ауқымды фан-парақша @taekwondo_wt_kz негізін қалаушы Саясат Өтемұратовқа рақмет.
АНЫҚТАМА:
Бүгін Оңтүстік Кореяның Чхунчхон қаласында таеквондодан жастар арасындағы әлем чемпионаты басталды.
Алғашқы жарыс күні даянгқа біздің командадан Элеанора Шералы (52 кг), Бекет Болатұлы (63 кг), Нұрай Қазынабек шықты. Бұлардың арасында алысқа шапқаны тек Нұрай болды. Қызылорданың тумасы үшін бұл жастар арасындағы соңғы жыл. Келесі жылдан бастап ол ересектер санатына өтеді.
Чемпионат 1-6 қазан аралығында өтеді. Биыл 127 ел + бейтарап ту астындағы (Ресей мен Беларусь) спортшылар мен босқындар командасын қосқанда 963 таеквондошы жүлдеге таласады.