Бұл туралы Ұлттық банктің Қаржылық тұрақтылық және зерттеулер департаментінің директоры Олжас Күбенбаев айтты.
Биылғы III тоқсанда жеке тұлғалардың ипотека мен автокредиттерге, тұтынушылық несиелерге деген сұранысы өскен, деп хабарлайды aqshamnews.kz
“Бір банктің ипотека өнімдеріне деген сұраныстың өсуіне бәсекелес банктердің кепіл талаптарын қатаңдатуы әсер етті. Нәтижесінде, кредит өтінімдерінің жалпы саны тоқсан бойынша 31%-ға (т/т) өсіп, 274 мыңға жетті” деді Олжас Күбенбаев.
Банктердің пікірінше, ұзаққа созылған өсімнен кейін кепілмен берілетін тұтыну кредиттеріне деген сұраныс аздап төмендеген. Бұл құбылысты банктер кепіл талаптарының қатаңдауымен байланыстырады. Алайда, кейбір банктердегі өтінім ағынының өсуіне байланысты түскен өтінімдер саны тоқсан бойынша 6%-ға (т/т) артып, 48 мыңға жеткен.
Кепілсіз тұтыну кредиттеріне деген сұраныс реттеуге байланысты өзгерістер аясында аздап төмендегені байқалады. Дегенмен, банктердің пікірінше, сұраныстың төмендеуі тек талаптарға емес, оларды жүзеге асырудағы уақытша техникалық мәселелерге көбірек байланысты болған. Осылайша, түскен өтінімдер саны 21,8 млн-ға жетіп, алдыңғы тоқсандағымен салыстырғанда 5%-ға өскен.
Автокредиттерге деген сұраныстың сәл өсуі, банктердің пікірінше, серіктес автосалондардың маркетингтік шараларына және олардың жартылай субсидиялаған кейбір акция өнімдерін ұсынуына байланысты. Нәтижесінде, кредит өтінімдерінің саны тоқсан бойынша 10%-ға (т/т) өсіп, 1,1 млн-ға жетті.