Алматы қаласында Наурыз мейрамын атап өту аясында Бостандық ауданының оқушылары арасында ұлттық спорт түрлерінен жарыстар өтті.
Бүгін №140 Мұқағали Мақатаев атындағы гимназияда ауданның 9-11 сыныптарынан 300-ден астам оқушы жиналды.
«Біз мұндай іс-шараларды жыл сайын ұйымдастырамыз. Басты мақсатымыз – дәстүрлі қазақ ойындарын насихаттау, ұлттық құндылықтарды нығайту, патриотизмді тәрбиелеу және жастардың спорттық рухын дамыту. Балалардың физикалық қабілеттерін, командалық рухын шыңдау және ең бастысы, салауатты өмір салтын қалыптастыру өте маңызды», – деді Бостандық аудандық білім бөлімінің басшысы Айгүл Қасымбек.
Аудан мектептерінің оқушылары қазақ күресі, асық ату, арқан тарту және басқа да спорт түрлерінен өздерінің күшін, ептілігін және төзімділігін көрсетті.
«Асық ойнауды маған атам үйреткен, біз бірге жиі асық атысамыз. Дала өркениетінен бастау алатын осындай ұлттық ойындардың бүгінгі күнге дейін сақталып, мемлекет тарапынан қолдау тауып жатқанына өте қуаныштымын», – деді №165 мамандандырылған лицейінің оқушысы София Ри.
Ұйымдастырушылар мен қонақтардың айтуынша, жарыс жоғары деңгейде өтті. Барлық қатысушылар жақсы физикалық дайындықтарын көрсетіп, жеңіске деген жігер танытты. Жеңімпаздар арнайы грамоталармен марапатталды.