Наурызбай ауданы инженерлік инфрақұрылымды жаңғыртып жатыр. Ақжар ықшам ауданында су құбыры мен кәріз жүйесінің тарататын желілерді салудың екінші кезеңі басталды. Өңірлік коммуникациялар қызметі мен аудан әкімдігі бірлесіп ұйымдастырған пресс-тур барысында журналистер осы жұмыстың барысымен танысты.
Былтырғы шілде айында басталған жобада 43,7 шақырым су құбыры мен 38,7 шақырым кәріз желісі тартылмақ. Жалпы құны 3,9 миллиард теңгені құрайтын құрылыс жұмыстарын осы күзге дейін аяқтау жоспарланған.
«Қазір ықшам ауданның 52 көшесінде құрылыс аяқталып, 37 шақырым су құбыры мен 35 шақырым кәріз құбыры тартылды. Күн сайын бұл нысанға 7-8 құрылыс бригадасы мен 20-дан астам арнайы техника жұмылдырылады», - дейді Наурызбай ауданы әкімінің орынбасары Жандос Тәкібаев.
Бұл аудандағы жүзеге асырып жатқан алты ауқымды инфрақұрылымдық жобаның бірі ғана. Бірінші кезең аясында Ақжар ықшам ауданында 3 шақырымнан астам инженерлік желілер салынған, ал құрылыс жұмысы 2025 жылдың шілде айында аяқталмақ. Үшінші кезеңде 12,7 шақырым кәріз бен 16,2 шақырым су құбыры желісі тағы салынады.
Қарағайлы ықшам ауданында бірінші кезеңнің жұмыстары аяқталып, 4,2 шақырым су құбыры мен 2,1 шақырым кәріз құбыры тартылған. Сонымен қатар, ұзындығы 35 шақырым болатын батыс кәріз коллекторы салынып жатыр, бұл Наурызбай және Алатау аудандарының 175 мың тұрғынын орталықтандырылған кәріз жүйесіне қоспақ. Қарағайлының оңтүстік-шығыс бөлігінде де магистралды кәріз желісін тартып жатыр.
«Осы жобалар жаңа және белсенді дамып келе жатқан Алматыдағы ықшам аудандардың он мыңдаған тұрғынын су құбыры мен кәріз қызметімен қамтамасыз етуге бағытталған», - деп атап өтті Жандос Тәкібаев.
Бұлар Наурызбай ауданында тұрақты инфрақұрылымдық базаның қалыптасуына мүмкіндік беріп, тұрғындардың өмір сапасын арттырмақ.