Алматы мемлекеттік бизнес колледжінде Наурыз мейрамы ерекше сән-салтанатымен аталып өтті. Колледждің менеджмент және маркетинг бөлімі, тамақтандыру индустриясы бөлімі және экономика және есептеу техникасы бөлімі үш күн қатарынан ұлттық құндылықтарды дәріптеген тағылымды іс-шаралар ұйымдастырып, студенттерге ұмытылмас әсер сыйлады, – деп хабарлайды aqshamnews.kz тілшісі.
Мерекелік шаралар барысында колледж ұжымы мен білім алушылары қазақ халқының бай дәстүрін, мәдениетін және рухани құндылықтарын кеңінен насихаттады. Студенттер ұлттық киім киіп, салт-дәстүрлерді сахналық қойылымдар арқылы көрсетіп, ұлттық ойындар ұйымдастырды. Үш бөлімнің студенттері дайындаған ұлттық тағамдар көрмесі көпшіліктің қызығушылығын тудырды.
Наурыз – тек көктем мерекесі ғана емес, ол – татулық пен бірліктің, ізгілік пен жаңарудың символы. Мемлекет басшысы Қасым-Жомарт Тоқаев өз сөзінде: «Наурыз – халқымыздың береке-бірлігін нығайтатын, ырыс пен ынтымақты арттыратын ерекше мейрам» деп атап өткен болатын. Бұл мерекенің мәні колледж қабырғасында да айқын сезілді.
Алматы мемлекеттік бизнес колледжінің директоры Асхат Берікбайұлы мерекенің маңыздылығына тоқталып, былай деді:
«Наурыз – біздің рухани тамырымызды жаңғыртатын ерекше мейрам. Білім беру ордасы ретінде біз тек кәсіби маман даярлап қана қоймай, ұлттық құндылықтарды бойына сіңірген тұлға қалыптастыруды басты міндет санаймыз. Осындай іс-шаралар студенттердің бірлігін нығайтып, олардың мәдени танымын кеңейтеді».
Биыл елімізде кеңінен аталып өтіп жатқан Наурызнама онкүндігі аясында әр күннің өзіндік мазмұны мен тәрбиелік мәні болды. Колледжде де осы бастамаға сәйкес қайырымдылық шаралар, ұлттық ойындар күні, мәдениет пен өнер күні, дәстүр күні секілді тақырыптық іс-шаралар өткізілді. Бұл студенттердің ұлттық сана-сезімін арттырып, қоғамға деген жауапкершілігін күшейтті.
Колледж директорының тәрбие ісі жөніндегі орынбасары Шолпан Маратқызы да мерекенің тәрбиелік мәніне ерекше тоқталды:
«Наурыз – тәрбие жұмысының ең маңызды бағыттарының бірімен тығыз байланысты мереке. Бұл күндері біз студенттерге тек дәстүрді көрсетіп қана қоймай, оның мәнін түсіндіруге тырысамыз. Үш күн бойы өткен іс-шаралар жастардың белсенділігін, ұйымшылдығын және шығармашылық қабілетін айқын көрсетті».
Әр бөлім өз ерекшелігімен көзге түсті. Менеджмент және маркетинг бөлімі мерекені заманауи форматта ұйымдастырып, ұлттық құндылықтарды жаңа қырынан таныстырса, экономика және есептеу техникасы бөлімі интеллектуалдық ойындар мен танымдық викториналар өткізді. Ал тамақтандыру индустриясы бөлімі ұлттық тағамдардың көрмесін жоғары деңгейде ұйымдастырып, нағыз мерекелік көңіл-күй сыйлады.
Алматы мемлекеттік бизнес колледжінде өткен Наурыз мерекесі – бірлік пен достықтың, ұлттық рух пен заманауи көзқарастың үйлескен жарқын үлгісі болды. Үш күнге созылған мереке колледж өмірінде ерекше із қалдырып, студенттерге рухани серпіліс сыйлады.