Алматы қаласы бойынша Қылмыстық-атқару жүйесі департаментіне қарасты №11 мекемесінде жазасын өтеп жатқан жасөспірімдерге қазақтың ат әбзелдері, ер-тұрманы таныстырылды.
Істі болып, түзеу мекемесінде отырған жастарға танымдық, рухани кеш сыйлаған – Әбілхан Қастеев атындағы Қазақстан Республикасының мемлекеттік өнер музейінің ғылыми-зерттеу магистрі Ақжігіт Нүсіп. Өнер өкілі балаларға қазақ атамыз пайдаланған ат жабдықтарының хронологиясы, типологиясы, әдіс-тәсілдері және көркемдік негіздері туралы айтып берді. Тақырыпқа қызығушылық танытқан жастар музейден келген қонаққа түрлі сауалдар қойды.
– Рухани құндылықтарымызды насихаттайтын осындай кездесулер жасөспірімдердің эстетикалық талғамын арттырады, өткенін қадірлеуге, тарихты білуге жетелейді деп білеміз. Біз оларға қайткен жағдайда да жақсы күндерден күдер үзбеуіне, әлі де өмірін түзеуге мүмкіндік барын ұғындырып, осындай танымдық кештер арқылы білімін, зердесін ашуға көмектесеміз, – дейді №11 мекеме бастығы әділет полковнигі Алмат Сүлейменов.