2024 жылдың 9 қаңтарында Алматы қалалық соты «Мударабах Капитал» қаржылық пирамидасы бойынша сотталғандардың апелляциялық шағымын қарай бастады, деп хабарлайды аlmaty-akshamy.kz.
Танымал вайнерлер Мейіржан Төребаев пен Мейірхан Шерниязовтың ісі қоғамда үлкен резананс тудырған болатын. Олар кінәлі деп танылып, бес жылға бас бостандығынан айырылған.
Апелляциялық сот процеске қатысушылардың тізімін нақтылаудан бастады. Атап айтқанда, жәбірленушілермен қатар қорғаушылар да қатысады. Сотталушылардың өздері онлайн желіде өтіп жатқан процеске әлі қосылмаған. Осыған байланысты адвокаттар олардың қатысуын сұрады. Кейбір қорғаушылар сот процесіне онлайн қатысуға, басқалары офлайн режимінде қатысатындықтарын білдірген.
Адвокаттар бұл іске қатысы бар күдікті Әділет Ораздың келуін де талап етті. Бұған дейін оған халықаралық іздеу жарияланған болатын. Ол жақында Бішкекте ұсталған болатын. Қырғызстанның Ішкі істер министрлігі оны тұлғаны тану функциясы бар сыртқы бейнебақылау камералары арқылы анықтағанын хабарлаған болатын.
«Жаңалықтардан Әділет Ораздың ұсталғаны туралы ақпарат берілді. Ол да бұл іс бойынша күдікті болатын. Айыптау қорытындысы мен үкімде ол осы әрекеттегі ең белсенді тұлға ретінде қылмыстық іс тағайындалған. Оның сотқа шақырылуын қамтамасыз етіп, апелляциялық сотқа қатысуын қамтамасыз етуіңізді сұраймыз», - деді адвокат Хамитұлы.
Айта кетейік, Төребаевтың екі адвокаты бар, ал қорғаушы ретінде оның әйелі Дана Есеева әрекет етеді.
2023 жылдың 23 маусымында Алмалы аудандық соты вайнерлер Мейіржан Төребаев пен Мейірхан Шерниязовқа үкім шығарды. Mudarabah Capital қаржылық пирамидасына қатысты іс бойынша барлығы 12 айыпталушы болды.
Төребаев пен Шерниязов «Қаржылық (инвестициялық) пирамиданы құру және басқару» Қазақстан Республикасының Қылмыстық кодексiнің 217 бабы бойынша кінәлі деп танылды. Олар бес жылға бас бостандығынан айыру жазасын қауіпсіздігі барынша төмен колонияда өтейтін болған. Қалған айыпталушылар 8 жылдан 14 жылға дейін бас бостандығынан айырылған.