Олар қайтарымсыз несие алып, өз бизнесін бастаған.
Алматы облысының тұрғындары өз кәсібін бастап, дамыту үшін арнайы курстардан білім алып, мемлекеттік қолдауға ие болып отыр, деп хабарлайды Almaty-akshamy.kz.
Өз кәсібін бастағандар қатарында Қарасай ауданының тұрғыны Ғалия Қожамбергенова да бар. Мамандығы бойынша инженер-құрылысшы болса да, тігін ісіне қызығушылық танытып, сүйікті ісіне айналдырды. Мемлекеттік бағдарлама аясында қайтарымсыз несие алып, өзінің тігін цехын ашты. Облыс бойынша «Еңбек» бағдарламасы аясында мыңнан аса бизнес жоба қайтарымсыз грант немесе жеңілдетілген несие алған.
«Кәсіпкерлер палатасы Қарасай аудандық филиалы директоры Орынбай Жанәділдің берген мәліметіне сүйенсек, биылғы жылы Қарасай ауданында «Бастау Бизнес» жобасы бойынша 484 аудан тұрғыны оқып, оның ішінен 70 бизнес-жоба қаржыландырылды»,– делінген Алматы облысының әкімдігі баспасөз қызметінің хабарламасында.
Айта кетерлігі, Алматы облысында жыл басынан бері Нәтижелі жұмыспен қамтуды және жаппай кәсіпкерлікті дамыту мемлекеттік «Еңбек» бағдарламасы аясында 2895 жұмыссыз жас «Бастау Бизнес» жобасы бойынша кәсіпкерлік негіздерін оқыды. Өткен және биылғы жылдың курс тыңдаушыларын қоса алғанда, 1050 бизнес-жоба грантпен қаржыландырылып, жеңілдетілген несие алды.
