Әлеуметтік желіде өзінің мектеп бітіру кешіне жинаған ақшасын дзюдодан жарысқа жұмсап, Азия кубогінде Қазақстан намысын қорғаған бозбаланың оқиғасы көпшіліктің жүрегін жылытты. Aqshamnews.kz тілшісі жас спортшымен тілдесіп, оқиға жайлы тереңірек білді.
Сән-салтанатты кештен бас тартып, ел намысын қорғауға Ташкенттегі жарысқа аттанған баланың есімі - Ерасыл Болатбек. Алматы қаласы, №5 мектеп-гимназиясының түлегі. Дзюдомен 10 жасынан бері айналысады. Желіде тараған видеоны Ерасылдың жаттықтырушысы жариялаған.
"Шешімім үшін еш өкінбеймін"
Ерасыл отбасының тұңғышы. Өзінен кейін інісі мен екі қарындасы бар. Спортқа қызығушылығы ата-анасының бағыт беруімен оянған. Ол "мектеп бітіру кешіне жұмсайсың" деп берген ата-анасының ақшасын жарысқа жұмсап жібергеніне еш өкінбейтінін айтты. Ол Ташкентте өткен Азия кубогінде қол жүлде иеленген.
"Бұл спортқа ата-анамның жол сілтеуімен бет бұрған едім. Қазір бұл менің өмірлік жолыма айналды. Мектеп бітіру кешіне арналған ақшаны ата-анам берген. Оны жарысқа баруға жұмсадым. Бұл мен үшін маңыздырақ болды. Солайша қола жүлде иелендім. Бұл шешіміме еш өкінбеймін", – дейді жас спортшы.
17 жастағы Ерасылдың жетістіктері де аз емес. Ол 2023 жылы Өскеменде өткен Қазақстан чемпионатының қола жүлдегері, 2025 жылы Оралда өткен Қазақстан чемпионатының жеңімпазы, Ташкентте өткен Азия кубогінің қола жүлдегері.
"Мақсатым - Олимпиада чемпионы болу"
Қазір Ерасыл Грузияда тәжірибе алмасуға бағытталған оқу-жаттығу жиынына қатысып жатыр. Жас спортшының басты мақсаты – Олимпиадаға қатысып, ел намысын абыроймен қорғау.
"Спортты соңына дейін қуып, Олимпиада чемпионы болғым келеді. Ал бос уақытта серуендегенді, жаңа елдерге саяхаттағанды, тәжірибе жинауды жақсы көремін", – дейді Ерасыл.
Жұрт жүлдеге көрімдік жіберген
Көпшіліктің ерекше ықыласына бөленген Ерасыл әлеуметтік желіде тарап кеткен видеодан кейін ел қолдауын айқын сезінген. Бірақ ешкімнен көмек сұрамағанын айтады.
"Мен ешқандай қаржылай көмек сұраған жоқпын. Бірақ адамдар өздері көрімдік деп банк картама ақша аударып, тілектерін білдіріп жатты. Бұл мен үшін үлкен қолдау", – дейді спортшы.
Айта кетейік, мектеп бітіру кешіне арналған қаржыны Ерасылға ата-анасы берген. Алайда ол бұл кешке бармайтынын алдын ала білген.
"Мектеп бітіру кешіне бәрібір қатыса алмаймын. Себебі дәл сол уақытта ұлттық құрамада оқу-жаттығу жиыны өтеді. Ақша мәселесінен емес, спорт мен үшін бірінші орында", – дейді ол.