28 тамызда, 2025/26 маусымындағы Лига чемпиондарының негізгі кезеңіне жеребе тарту рәсімі өтті, деп хабарлайды Aqshamnews.kz.
Жеребе тартуға 36 клуб қатысты, олардың қатарында алматылық «Қайрат» бар. Бұл - клуб тарихындағы алғашқы негізгі кезеңге жолдама.
«Қайрат» жеребе тарту алдында төртінші себетке түсті.
Оның бірінші қарсыласы - «Реал Мадрид». Клуб Алматыға келеді.
Ал екінші қарсыласы - италиялық «Интер» футбол командасы. Бұл жолы «Қайрат» Италияға қонаққа барады.
Келесі қарсыласы - «Арсенал». «Қайрат» Ұлыбританияға, Лондонға барады.
Төртінші қарсыласы - «Брюгге». Белгиялық футбол клубы Алматыға келеді.
Бесінші қарсыласы - «Спортинг», Лиссабон, Португалия. «Қайрат» қонаққа барады.
Алтыншы қарсыласы - «Олимпиакос», грекиялықтар Алматыға келеді.
Жетінші қарсыласы - «Пафос», кипрлықтар Алматыға келеді.
Соңғы қарсыласы - «Копенгаген», «Қайрат» Данияға қонаққа барады.
Күнтізбе 30 тамызда жарияланады.
Айта кетейік, алғашқы себетке түскен қарсыластардың қатарында әлемдік футболдың алып клубтары бар: «ПСЖ», «Реал Мадрид», «Манчестер Сити», «Бавария», «Ливерпуль», «Интер», «Челси», «Боруссия Дортмунд» және «Барселона».
Жеребе тарту рәсімінің тікелей көрсетілімі Qazsport телеарнасынан көрсетілді.
Еске салайық, алматылық команда Лига чемпиондарының плей-офф кезеңіндегі жауапты матчта шотландиялық «Селтикпен» тең ойнаған болатын (0:0). Нәтижесінде «Қайрат» пенальти сериясында 3:2 есебімен жеңіске жетіп, қақпашы Темірлан Анарбековтың ерлігі арқасында негізгі кезеңге өтті.
