Мархабат Жайымбетов онлайн сауданың қарқынды дамуы еліміздегі экологиялық ахуалға кері әсер етіп отырғанын мәлімдеді. Ол бұл туралы Қазақстан Республикасының Премьер-Министрі Олжас Бектенов атына жолдаған депутаттық сауалында атап өтті, – деп хабарлайды aqshamnews.kz тілшісі.
Депутаттың айтуынша, соңғы жылдары электрондық сауда экономиканың маңызды бөлігіне айналып, халық үшін қолайлы қызмет түрі ретінде кеңінен таралған. Алайда бұл үдеріс қоршаған ортаға қосымша жүктеме түсіріп отыр.
Атап айтқанда, тауарларды жеткізу барысында пластик, пленка және картон секілді бір реттік қаптамалардың шамадан тыс қолданылуы тұрмыстық қалдықтардың көлемін арттыруда. Соның салдарынан қоқыс полигондарына түсетін жүктеме жыл сайын көбейіп келеді.
Сонымен қатар, жеткізу қызметтерінің көбеюі көлік қозғалысын арттырып, көмірқышқыл газының бөлінуіне әсер етуде. Әлемдік зерттеулерге сәйкес, жүк тасымалы жалпы шығарындылардың елеулі бөлігін құрайды.
Депутаттық сауалда келтірілген деректерге сүйенсек, елімізде жыл сайын 4,5–5 миллион тоннадан астам коммуналдық қалдық түзіледі. Ал қайта өңдеу деңгейі 2025 жылы шамамен 28 пайызды ғана құраған. Бұл көрсеткіш қалдықтарды басқару жүйесін жетілдіру қажеттігін көрсетеді.
AMANAT партиясы өкілі экологиялық жағдайды жақсарту үшін бірқатар нақты ұсыныстарды алға тартты. Атап айтқанда, электрондық саудада бір реттік қаптаманы қысқарту, қайта пайдаланылатын экологиялық қаптамаларды енгізу, ірі платформалар үшін қалдықтарды қайта өңдеуге қатысты жауапкершілікті күшейту ұсынылды.
Сондай-ақ, ірі қалаларда көп рет қолданылатын қаптама жүйесін енгізу және қалдықтарды сұрыптау инфрақұрылымын дамыту мәселесі де көтерілді.
Мархабат Жайымбетов табиғатты қорғау тек мемлекеттің ғана емес, бизнес пен қоғамның да ортақ міндеті екенін атап өтті. Оның пікірінше, электрондық сауданың дамуы экологиялық жауапкершілікпен қатар жүруі тиіс.