Мәулен Әшімбаев әуе апатынан қаза тапқандардың туыстарына көңіл айтып, Сенат отырысын ашты
Сенат төрағасы Мәулен Әшімбаев Ақтау маңында болған қайғылы әуе апатына байланысты пікір білдірді. Azerbaijan Airlines әуе компаниясына тиесілі ұшақ апаты салдарынан 38 адамның өмірі қиылды, деп хабарлайды aqshamnews.kz
«Кеше Маңғыстау облысында болған әуе апаты бәрімізді терең қайғыға бөледі. Өкінішке қарай, экипаж мүшелері мен жолаушылар қаза тапты. Олардың арасында Қазақстан азаматтары да бар. Барлық қаза тапқандардың жақындары мен туыстарына көңіл айтамыз,» — деді Әшімбаев.
Сондай-ақ, Сенат төрағасы Президенттің тапсырмасымен мемлекеттік комиссия құрылғанын атап өтті. Қазіргі таңда барлық құзырлы органдар мен қызметтер құтқару операциясы аясында қажетті шараларды қолға алған.
Мәулен Әшімбаев құтқарушылар мен медицина қызметкерлерінің үйлесімді жұмысы зардап шеккендердің тезірек сауығуына оң әсерін тигізеді деген үмітін білдірді.