Алматы облысында мас күйінде көлік басқарудың қайталанған 47 фактісі анықталып, заң бұзушылар қылмыстық жауапкершілікке тартылды, деп хабарлайды aqshamnews.kz
Жыл басынан бері облыс бойынша алкогольдік және есірткілік мас күйде көлік басқарғаны үшін 768 адам әкімшілік және қылмыстық жауапкершілікке тартылған. Бұл санның ішінде мас күйінде рульге қайта отырған 47 жүргізуші ерекше назарға ілінді.
Патрульдік полиция мұндай бұзушыларды анықтау үшін үнемі рейдтік шаралар ұйымдастырып келеді. Бұл жұмыстардың басты мақсаты – жол қозғалысы қауіпсіздігін қамтамасыз ету және қайталанатын құқықбұзушылықтардың алдын алу.
Осындай бұзушылықтардың бірі Еңбекшіқазақ ауданында тіркелді. 35 жастағы ер адам 2023 жылы қазан айында сот шешімімен өмір бойы жүргізуші куәлігінен айырылғанына қарамастан, қайтадан рульге отырған. Патрульдік полиция оны ұстап, сараптама нәтижесінде есірткі қолданғанын анықтады. Соттың шешімі бойынша, тәртіп бұзушы екі жылға бас бостандығынан айырылды.
Өңірде құқықбұзушылықтардың алдын алу үшін арнайы бақылау шаралары күшейтілді. Бұрын мас күйінде көлік басқарған жүргізушілердің тізімі патрульдік полицияның ерекше бақылауына берілген. "Құқықтық тәртіп" жедел-профилактикалық іс-шарасы арқылы мас жүргізушілер мен жасырын есірткі тұтынушыларды анықтау жұмыстары жалғасуда.
Полицейлер рульде отырған әр азаматты өз қауіпсіздігі мен айналасындағылардың амандығына жауапкершілікпен қарауға шақырады. Мұндай заң бұзушылықтар тек құқықтық жазаны ғана емес, сонымен бірге қайғылы оқиғаларды да тудыратынын ескеру қажет. Жолдардағы қауіпсіздікті қамтамасыз ету – барлығымыздың ортақ міндетіміз.