Алматы қаласы Қоғамдық кеңесінің мүшесі Марат Калимолдин Қазақстан Республикасының жаңа Конституциясының қабылдануын тарихи маңызы зор оқиға деп атап, оның елдің одан әрі дамуы мен азаматтардың құқықтарын қорғаудағы айрықша рөліне тоқталды, – деп хабарлайды aqshamnews.kz тілшісі.
Оның айтуынша, жаңа Конституция азаматтардың құқықтары мен бостандықтарының кепілі ретінде мемлекеттің басты құжаты болып табылады және Қазақстанның жаңа даму кезеңіне берік негіз қалайды.
«Бүгін біз көптен күткен, тарихи маңызы зор оқиғаның куәгері болып отырмыз. Қазақстан Республикасының жаңа Конституциясы қабылданып, ол азаматтардың құқықтары мен бостандықтарының кепілі ретінде еліміздің басты мемлекеттік құжаты болып бекітілді. Бұл маңызды қадам Қазақстанның жаңа серпінмен дамуына, алға қойған мақсат-міндеттеріне қол жеткізуіне және жаңа белестерді бағындыруына жол ашады», – деді Марат Калимолдин.
Сондай-ақ ол жаңа Конституцияның қоғамдағы әділдік қағидаттарын нығайтып, әрбір азаматтың құқықтарын қорғаудың сенімді тетігіне айналатынына сенім білдірді.
«Осы айтулы әрі игілікті оқиғамен еліміздің барша азаматтарын шын жүректен құттықтаймын. Жаңа Конституция Қазақстан Республикасының әрбір азаматы үшін сенімді қорған, әділдік пен тұрақтылықтың берік негізі болсын», – деп қорытындылады Алматы қаласы Қоғамдық кеңесінің мүшесі.
Жаңа Конституцияның қабылдануы еліміздің саяси және құқықтық жүйесін одан әрі жетілдіруге, заң үстемдігін нығайтуға және азаматтардың құқықтары мен бостандықтарын қорғаудың жаңа кезеңін қалыптастыруға бағытталған маңызды қадам ретінде бағалануда.