Алматы қаласындағы «Ұстаздар үйіне» «Өрлеу» БАҰО» АҚ Басқарма төрағасы Әсел Мұхаметжанова бастаған орталық қызметкерлері заманауи талап деңгейінде мұғалімдердің кәсіби біліктілігін арттыру барысындағы өзекті мәселелердің түйінді шешімдерін бірлесіп қарастыру мақсатында арнайы іссапармен келді.
Кафедраның профессорлық-оқытушы құрамымен кездесуде Әсел Зейнулақызы Ұлттық орталықтың қызмет көрсету аясын кеңейту мақсатында жасалған бірқатар жұмыстарға тоқталып, келешекте атқарылатын міндеттерге бағдар жасады. Институттың аға оқытушылары мен тренерлерінің курс сапасын арттыруға қатысты маңызды ұсыныстарымен танысып, ой-пікірімен бөлісті.
Қызмет бабындағы жүздесу Алматы қалалық білім басқармасында жалғасты. Кездесу барысында біліктілікті арттыру курстарын жүйелі, сапалы өткізудің тиімді жолдары қарастырылды. Мектеп пен «Өрлеудің» арасындағы әріптестік, іскерлік байланыстар зерделенді. Бір мақсат, бір мүдде – оқушыға саналы тәрбие, сапалы білім беруді көздейтін басшылар мұғалімдерге қолдау көрсету аясында эксперименттік зерттеу алаңдарының, тірек мектептерінің жұмысын жандандырудың өзектілігін талқылады.
Басқарма басшысы Әсел Зейнулақызы курстарда мұғалімдердің білім алу мен кәсіби дағдысын қалыптастыруға жүйелі жұмыстардың жоспарланып отырғанын, Білім және ғылым министрінің тікелей тапсырмасы бойынша «Өрлеу» тамыз айында «Педагогтердің цифрлық құзыреттілігін дамыту» курсын бастайтындығын жеткізді. Бұл курс демалыста болған мұғалімдердің ақпараттық-коммуникациялық біліктілігін арттырып, жаңа оқу жылына дайындығын еселей түспек.