Оқушылардың 80%-ы мамандық таңдамас бұрын ата-анасы мен мұғалімдеріне құлақ асады.
Мұндай деректі «Болашақ» қауымдастығы кеңесінің мүшесі Мұхтар Манкеев келтіріп отыр, деп хабарлайды Almaty-akshamy.kz ҚазАқпаратқа сілтеме жасап.
«Статистикалық зерттеу деректері бойынша, еңбекке қабілетті халықтың 60 пайыздан астамы мамандық бойынша жұмыс істемейді. Бұл – үлкен мәселе. Сондай-ақ мектеп оқушыларының 80 пайызы ата-анасы мен мұғалімдердің ықпалымен мамандық таңдайтынын көріп отырмыз. Бұл ретте ата-аналардың 25 пайызы балаларының қандай мамандық таңдағысы келетіні туралы түсініктері жоқ екенін мойындайды. Осы сияқты басқа да статистикалық мәліметтер біздің қоғам белсенділері ретінде жобаны қолға алуға ықпал етті», - деді «Болашақ» өкілі.
Ол биыл қауымдастық өкілдері шалғай ауылдардағы 500-ден астам мектепте кездесу өткізетінін жеткізді
«2021-22 жылдары 40-тан астам мектепке барып, кездесулер өткізген болатынбыз. 2023 жылдың соңына дейін 500-ден астам мектепті қамтымақшымыз, Басты назарда, әрине, шалғай аймақтардағы, аудандардағы мектептер болады», - деді ол.