Мамандық таңдау – әрбір жас үшін маңызды кезеңдердің бірі. Алайда, ерекше қажеттіліктері бар балалар үшін бұл процесс белгілі бір қиындықтармен қатар жүреді. Осыған байланысты, оларға бағыт-бағдар беру, ыңғайлы мамандықтарды ұсыну – маңызды міндеттердің бірі.
№2 арнайы мектеп-интернат директорының орынбасары Жанар Құттықадамқызының айтуынша, жыл сайын қаладағы бірнеше колледж оқытушылары арнайы келіп, балаларға кәсіби бағдар береді. Бұл кездесулер барысында олардың мүмкіндіктері ескеріліп, қолайлы мамандықтар туралы толық ақпарат беріледі.
«Ерекше балалар үшін мамандық таңдау оңай емес. Мысалы, тірек-қимыл аппараты бұзылған балаларға кейбір мамандықтарды меңгеру қиынға соғуы мүмкін. Сондықтан олар көбінесе Алматы флористика колледжі мен Алматы технология колледжін таңдайды. Бұл оқу орындарында біздің балаларға лайықты мамандықтар көп. Әсіресе, тоқыма, тігіншілік, етікшілік, ІТ саласы секілді кәсіптерге сұраныс жоғары», – дейді Жанар Құттықадамқызы.
Дегенмен, ерекше қажеттіліктері бар түлектердің арасында медицина, педагогика сияқты салаларда да қызмет етіп жүргендері аз емес. Бұл олардың тек белгілі бір шеңберде шектелмей, өз мүмкіндіктерін толықтай жүзеге асыруға талпынатынын көрсетеді.
Қазіргі таңда ерекше балаларға арналған мамандықтар мен олардың еңбек нарығына бейімделуі маңызды тақырыптардың бірі болып отыр. Сондықтан, мұндай іс-шаралардың жиі ұйымдастырылуы – олардың болашаққа сеніммен қадам басуына үлкен мүмкіндік береді.