2025 жылдың 15 мамырында Қазақстан Республикасы Қорғаныс министрлігінің «Әскери-техникалық мектебі» РМҚК Алматы филиалы өзінің 25 жылдық мерейтойын атап өтті. Шара барысында бұл мекеменің еліміздің қорғаныс қабілетін арттырудағы елеулі рөлі мен тарихи жолы кеңінен атап өтілді, деп хабарлайды aqshamnews.kz
Алматы филиалының негізі 1938 жылдың 7 ақпанында қаланған. Сол кезде құрылған Алматы автомобиль-мото клубы болашақ әскери-техникалық мектептің алғашқы нұсқасы болды. Осы онжылдықтар ішінде клуб 12 мыңнан астам жүргізуші, мотошабандоз және танк механиктерін даярлап шығарды. Кейін бұл база негізінде радиоклуб, теңіз клубы сынды бағыттар қосылып, 1974 жылы Алматы біріккен техникалық ДОСААФ мектебі болып қайта құрылды. Радио клуб 7 000-нан астам радиомаманды, теңіз клубы 3 500 электр механигі мен 1 800 суасты шеберін оқытып шығарды.
2000 жылдың 13 маусымында ҚР Үкіметінің №718 қаулысына сәйкес Алматыдағы әскери-техникалық құрылым ҚР ҚК ӘТМ Алматы филиалы болып қайта ұйымдастырылды.
1991 жылдан бері бұл филиал 14 296 ВС санатындағы жүргізушіні, 1 011 радиотелеграфисті және 1 166 радиолокациялық станция операторын дайындады. 2013-2024 жылдары аралығында 8 000-нан астам адам әскери оқытылған резерв бағдарламасы бойынша оқудан өтті. Бүгінгі таңда филиалда атқыш, мерген, пулеметші, гранатометші, барлаушы, ҰҰА (ұшқышсыз ұшу аппараты) операторы және радиотелеграфист секілді мамандықтар бойынша әскери даярлық жүргізіледі.
Алматы филиалының басты миссиясы — жастарды әскери-патриоттық рухта тәрбиелеу және «Қазақстан жолы — 2050» стратегиясын жүзеге асыруға үлес қосу. Мектеп жас ұрпақты Отанын қорғауға, елін сүюге және ұлттық құндылықтарды қадірлеуге баулиды.
Мерейтойға арналған салтанатты жиында запастағы полковник Әлібек Длимов ұжымды құттықтап, әскери кадрлар даярлауда атқарылған еңбекті жоғары бағалады.