Аqshamnews.kz редакциясы "Күн саны" айдарында аптаның ең маңызды деректеріне шолу жасады.
1,4 млн тонна қалдық жиналды
"Таза Қазақстан" акциясы аясында былтыр жыл басынан бері бүкіл ел бойынша 1,4 млн тонна қалдық жиналып, елді мекендерде 2 млн 400 мыңнан аса ағаш отырғызылды. Акцияға қатысушылардың жалпы саны шамамен 9 млн адам, оның ішінде 448 мыңы еріктілер.
"Таза Қазақстан" бастамасы тек қоқыс жинаумен немесе ағаш отырғызумен шектелмейді. Бұл әлдеқайда терең және ауқымды жоба. Оның басты мақсаты – қоғамда экологиялық білім мен мәдениетті қалыптастыру. Біздің басты міндетіміз – әр азаматтың, әсіресе жас ұрпақтың табиғатқа деген көзқарасын өзгерту", – деді ҚР Экология және табиғи ресурстар вице-министрі Мансұр Ошурбаев ОКҚ алаңында өткен баспасөз конференциясында.
Биыл еліміз бойынша 236 мектептен 12 мыңнан астам оқушы 36 мың тұқым отырғызды.
1-сыныпқа қабылданған балалардың 70%-ы қазақ тілде оқуды таңдаған
1 сәуірден бастап 1-сыныпқа құжат қабылдау басталды.
Оқу-ағарту министрлігінің мәліметінше, бүгінгі күнге дейін еліміздің мектептеріне 273 643 бала қабылданды, олардың 70%-ы мемлекеттік тілде оқуды таңдаған.
Жыл басынан бері Қазақстан экономикасы 6,2 пайызға өсті
Қазақстан экономикасы осы жылғы қаңтар-маусым айларының қорытындылары бойынша 6,2%-ға жетіп, оң өсімді көрсетті. Бұл туралы Үкімет отырысында Премьер-министрдің орынбасары – ұлттық экономика министрі Серік Жұманғарин баяндады.
Бұл қарқын - алғашқы бес айға қарағанда 0,2%-ға жоғары және кейінгі 14 жылдағы ЖІӨ өсуінің ең жоғары көрсеткіші. Салыстыру үшін, былтырдың ұқсас кезеңінде өсім 3,2% болды.