Камчатка билігі 25 қыркүйектен бастап бүкіл аймақты интернеттен толық ажырататынын мәлімдеді, - деп хабарлайды Аqshamnews.kz тілшісі.
Ресми себеп – "Ростелекомның" суасты талшықты-оптикалық желіні жөндеуі. Жұмыс 48 сағатқа жоспарланғанымен, ауа райына байланысты 29 қыркүйекке дейін созылуы мүмкін.
Тек негізгі нысандар – банктер, дүкендер, жедел қызметтер – уақытша спутник байланысқа көшеді. Билік тұрғындар азық-түліксіз қалмайтынын мәлімдеді. Осылайша Камчатка – Ресейде интернеттен толық ажыратылатын алғашқы аймақ болмақ.
The Moscow Times дерегінше, Ресейде мамырдан бері интернет шектеу жиілеп кеткен: мамырда – 69, маусымда – 662, шілдеде – 2 099, тамызда – 2 129 рет тіркелген. Қыркүйекте де күн сайын 60-70 аймақта мобильді интернет шектеліп жатыр.
Ресейдің цифрлық даму министрлігі "ақ тізім" енгізді: Яндекс, банктер, маркетплейстер, ресейлік әлеужелілер мен мемлекеттік сайттар қолжетімді болады. Бірақ тізім апта сайын өзгеріп отырады.
Халық қолма-қол ақша айналымына оралуға мәжбүр. Такси, жеткізу қызметтері, онлайн төлемдер істемей, адамдар Wi-Fi іздеп сенделіп жүр. Тіпті кей жерлерде SMS-хабарламалардың көлемі рекорд жаңартқан.
Сарапшылар мұны қауіпсіздік сылтауымен жасалған жоспарлы шара деп санайды. Ал кей депутаттар тіпті интернетті демалыс күндері тұрақты түрде өшіруді ұсынды.