2025 жылдың басынан бері Қазақстанда 855 мыңнан астам отбасы көпбалалы және наградталған аналарға арналған мемлекеттік жәрдемақы алды, - деп хабарлайды Aqshamnews.kz.
Жалпы төлем сомасы 404,3 млрд теңгені құрады. Бұл туралы Еңбек және халықты әлеуметтік қорғау министрлігі мәлімдеді.
Атап айтқанда:
- Көпбалалы отбасыларға – 612 мың отбасы, жалпы сомасы 352,2 млрд теңге;
- Наградталған аналарға – 243 мың адам, жалпы сомасы 52,1 млрд теңге жәрдемақы алды.
2025 жылдың тамыз айында ғана бұл төлемдермен 846,8 мың отбасы қамтылып, 49,8 млрд теңге көлемінде қаржы төленді.
Жәрдемақы мөлшері қандай?
Көпбалалы отбасыларға табыс деңгейіне қарамастан төленеді. Бұл жәрдемақыны бірге тұратын 4 және одан да көп баласы бар (23 жасқа дейінгі күндізгі бөлімде оқитын студенттерді қоса алғанда) отбасылар ала алады.
2025 жылы төлем мөлшері былайша белгіленді:
- 4 балаға – 63 030 теңге
- 5 балаға – 78 798 теңге
- 6 балаға – 94 565 теңге
- 7 балаға – 110 332 теңге
- 8 және одан да көп балаға – әр балаға 15 728 теңге
Наградталған аналарға арналған жәрдемақы келесі түрде төленеді:
- «Күміс алқа» иегерлеріне – 25 165 теңге
- «Алтын алқа», «Батыр ана» атағы, І/ІІ дәрежелі «Ана даңқы» ордені иегерлеріне – 29 097 теңге
Айта кетейік, 2025 жылдың 1 қаңтарынан бастап бұл жәрдемақылардың мөлшері 6,5%-ға артты.