Түнгі уақытта баланың жылағаны үшін көршілер 112 нөміріне қоңырау шалып, "тыныштық бұзылды" деп шағымдануы мүмкін. Мұндай жағдайда ата-аналар абдырап, тәртіп сақшылары толтырған хаттамаға қол қойып жатады. Алайда заң бойынша баланың жылауы – қасақана жасалған құқықбұзушылық емес. Демек, полицейлер 437-баппен хаттама толтыра алмайды. Aqshamnews.kz көпбалалы отбасыларға осы жағдайда не істеу керегін түсіндіреді.
Түнде баланың жылауы – әкімшілік құқықбұзушылық па?
Қазақстан Республикасының Әкімшілік құқықбұзушылық туралы кодексінің 437-бабында тыныштық пен демалысты қасақана бұзу жауапкершілікке тартылатыны көрсетілген. Яғни, қатты музыка қою, әдейі шулау, жөндеу жұмыстарын түнде жасау секілді әрекеттер жатады.
Ал баланың жылауы – ата-ананың еркіне бағынбайтын, табиғи жағдай. Бұл жерде:
- шу қасақана жасалмайды;
- тыныштықты әдейі бұзу ниеті жоқ;
- ата-ана баланы әдейі жылатпайды.
Сондықтан мұндай жағдайда 437-бап бойынша хаттама толтыру – заңсыз.
Полиция келсе, не істеу керек?
Егер түнде полиция қызметкерлері келіп, хаттама толтырмақ болса, ата-аналар мына жайттарды білуі тиіс:
-
Хаттамамен келіспейтініңізді айтыңыз
"Баланың жылауы қасақана емес, сондықтан 437-бап қолданылмайды" деп нақты жеткізуге болады. -
Дәлел сұрауға құқығыңыз бар
Тыныштықтың бұзылғанын дәлелдеу үшін:
- арнайы децибелл өлшейтін құрал болуы керек;
- өлшеу жүргізіліп, нәтиже хаттамаға тіркелуі тиіс.
Егер мұндай өлшеу жасалмаса, хаттама заңды күшке ие болмайды.
-
Хаттамаға қол қоюға міндетті емессіз
Қол қоятын болсаңыз, міндетті түрде:
"Хаттамамен келіспеймін, баланың жылауы – табиғи жағдай" деп жазып қалдырыңыз.
Көпбалалы отбасы үшін маңызды
Көпбалалы немесе жас баласы бар отбасы – әлеуметтік тұрғыда қорғалатын санат. Сот тәжірибесінде де баланың жылауы үшін ата-ананы әкімшілік жауапкершілікке тарту фактілері жарамсыз деп танылған.
Егер іс сотқа жетсе, ата-ана:
- баланың жасын;
- түнгі уақытта жылау физиологиялық қажеттілік екенін;
- қасақана шу болмағанын
дәлел ретінде келтіре алады.