Бостандық ауданындағы №68 бөбекжай-балабақша шаңырағында «Музыкалық аспаптар және олармен жақын танысу» атты қалалық семинар өтті.
«Бұл ән бұрынғыдан өзгешерек...» деп Шәкәрім бабамыз айтқандай, шындығында бұл тағылымы зор кеш болды. Көнеден жеткен аспаптардың күмбірі бақша ішін кернеді.
-«Біртұтас тәрбие» бағдарламасын негізге ала отырып, осы тақырыптқа тоқталдық. Өйткені, кішкентай балалар домбыраны жақсы біледі. Өйткені, ұлтымыздың құндылығы киелі домбыра кез-келген отбасының төрінен табылады. Ал, сазсырнай мен қылқобызды көре бермеуі мүмкін. Жалпы, баланың жан-жақты дамып, толық қалыптасуы үшін музыканың алар орны ерекше. Кезінде ұлы Абай атамыз «ойын ойнап, ән салмай өсер бала бола ма?» деп тегін айтпаған ғой. Иә, бала ойын арқылы өсіп, ойын арқылы дамиды.
Ал, музыка арқылы олардың эстетикалық талғамы дамиды,-деген балабақша меңгерушісі Бағдат Алтынбекқызы кештің мазмұнына тоқталды.
Бөбекжай-балабақшаның музыка жетекшісі Ғалымжан Шәріпов музыкалық жоғары білімі бар, бірнеше аспапта шебер ойнайтын жан-жақты маман. Семинар барысында әрбір аспаптың шығу тарихын айтып, таныстырып отырды. Балалар экран ақылы көрсетілген аспапты даусынан танып, музыкаға деген қабілеттіліктерін танытты. Балалар музыка аспабыныңорындалуына ғана емес оның дыбысталуына да мән беріп отырды. Бұл күні өнерпаз ата-аналар домбыра, баян, шертер, сазсырнаймен қатар, ең көне үрмелі аспап түрі саксафонда ойнады. Қатысушылардың да жандары жадырап, рухани демалып қайтты.
«Музыка-жанды жадыратады. Өнерді түсініп өскен баланың өресі биік, адами қасиетке бай болады. Бәлкім, осы балаларымыздың арасынан болашақ өнер адамының шықпасына кім кепіл,- дейді ризашылық білдірген ата-аналар.