Қатысушылар теміржол аралығының аумағын тексеріп, нысан қабырғаларына салынған заңсыз жазулар мен граффитилерді анықтады, деп хабарлайды aqshamnews.kz тілшісі.
Петропавл станциясындағы көліктегі полиция бөлімінің қызметкерлері еріктілермен бірге Петропавл – Кондратовка теміржол аралығында заңсыз жазулар мен граффитилерді анықтау және жою бойынша профилактикалық іс-шара өткізді.
Іс-шараның негізгі мақсаты – теміржол инфрақұрылымы нысандарының тиісті санитарлық және эстетикалық жай-күйін сақтау, олардың зақымдану фактілерінің алдын алу, сондай-ақ жастардың қоғамдық мүлікке жауапкершілікпен қарауын және белгіленген мінез-құлық нормаларын сақтауын қалыптастыру.
Бірлескен жұмыс барысында қатысушылар теміржол аралығының аумағын тексеріп, нысан қабырғаларына салынған заңсыз жазулар мен граффитилерді анықтады және оларды тазартуға кірісті. Атқарылған жұмыстардың нәтижесінде теміржол нысандарының қабырғалары тиісті қалыпқа, ал іргелес аумақ ретке келтірілді.
Іс-шара аясында жастармен профилактикалық жұмыс жүргізуге ерекше көңіл бөлінді. Студент-еріктілердің мұндай бастамаларға қатысуы өскелең ұрпақтың бойында азаматтық жауапкершілік сезімін, қоршаған ортаға және қоғамдық мүлікке ұқыпты қарауды дамытуға ықпал етеді.
Тәртіп сақшылары теміржол инфрақұрылымы нысандарына түрлі жазулар мен граффити салу олардың сыртқы түрін бұзып қана қоймай, мүліктің зақымдануына әкеп соғуы мүмкін екенін атап өтті. Осыған байланысты мұндай фактілерді дер кезінде анықтау және профилактикалық іс-шаралар өткізу маңызды мәнге ие.
Көлік полицейлері теміржол көлігі нысандарында құқық бұзушылықтардың алдын алу және қоғамдық тәртіпті қамтамасыз ету бағытындағы жұмысты жалғастырады.