Бүгін Мәжілісте "Құқық бұзушылық профилактикасы туралы" Заң жобасының бірінші оқылымы өтті. Депутат Аманжол Әлтай қазақ киносын сынап тастады, - деп хабарлайды Аqshamnews.kz тілшісі.
"Құқық бұзушылық профилактикасы нәтижелі болуы үшін жастар тұтынатын ақпаратты дұрыстауымыз керек. Қазақи тілмен айтқанда, көргені мен естігені дұрыс болуы қажет. Қазақ боламын десең, экраныңды дұрыста. Кейде маған қазақ киносының ары мен ұяты кешегі Шәкен Аймановпен бірге кеткендей көрінеді. Жаңа қазақ киносында тәлім мен тәрбиеге қайшы дөрекі сөздер көбейді. Сондықтан мұндай кемшіліктерді прокатқа шықпай тұрып түзету қажет деп ойлаймын. Өйткені бұл бүгінгі қоғамдағы бұзақылыққа итермелейтін түрлі теріс әрекеттерге алып келеді. Бұл - біз жастарды естігені мен көргенін дұрыстай алмай жатырмыз деген сөз. Біз теріс әрекеттерге тосқауыл қоюымыз керек", - деді ол.
Депутат сөз соңында құзырлы органдарды бірлесіп жұмыс істеуге шақырды.
