Танымал әнші Баянсұлудың репертуарындағы бірқатар хит әндердің авторы композитор Қуат Әбіл ел алдына шығып, даулы жағдайға байланысты халыққа үндеу жасады, – деп хабарлайды aqshamnews.kz тілшісі.
Композитордың айтуынша, өзіне тиесілі әндер үшін қаламақы төленбеген, ал мәселені заңды түрде шешуге тырысқан сәтте, керісінше сотқа шақырту алған.
Қуат Әбіл Баянсұлудың ең танымал бес әнінің авторы болғанымен, ұзақ уақыт бойы еңбекақысыз жұмыс істеген. Осыған байланысты ол бұған дейін әншінің YouTube-тағы бірнеше әнін өшірткенін, орындауға тыйым салғанын, алайда кейін қайта келісім арқылы қайта жүктелгенін айтты.
Қуат Әбілдің айтуынша, Баянсұлу бұрынғы продюсерімен жұмысын тоқтатқаннан кейін, жаңа командасымен бірге өзіне қайта жүгінген. Ал композитор тиесілі қаламақысын төлеуді сұрағанда сотқа шақырту қағаз алған. Енді ол елден әділдік сұрап отыр.
«Менің бес балам бар. Көмек сұрап келген кезде барымды салып, жақсы әндерімді бердім. Танылып алғаннан кейінгі қарым-қатынас осындай болды. Сонда әділдік қайда?» – деді ол видеоүндеуінде.
Айта кетейік, бұған дейін Баянсұлу өзінің продюсері Әлішер Бурхановпен жұмысын тоқтатқанын мәлімдеген болатын. Әнші «Ауа райы», «Сондайым бар енді», «Ұмытсам да» сынды танымал әндері арқылы көпшілікке кеңінен танылған болатын.