Үстел теннисінен Қазақстан құрамасының мүшесі Кирилл Герасименко Париж ойындарына қатысатын болды. Ол олимпиадалық цикл барысындағы іріктеу кезеңдерінде жинаған ұпай нәтижесі бойынша Олимпиадаға жолдама иеленіп отыр, деп хабарлайды аlmaty-akshamy.kz.
Халықаралық үстел теннисі федерациясының жаңарған рейтингінде қазақстандық теннисші құрлықта жолдама алмаған спортшылар арасында бірінші орында тұр.
Герасименко осымен үшінші рет Олимпиада ойындарына жолдама алып отыр. Ол бұған дейін Рио-2016 және Токио-2020 ойындарына қатысқан болатын. Алайда, жүлделі орындарға іліне алмады.
Айта кетейік, қазіргі уақытта Қазақстан спортшылары иеленген жолдамалар саны 69-ға жетті. Оның ішінде ең көп жолдаманы еліміздің боксшылары иеленіп отыр.