ЕО ресейлік көмір импортына тыйым салады
Еуроодақ елдері ресейлік қазбалы отын импортынан түбегейлі бас тарту жағын қарастыра бастады, деп хабарлайды Аlmaty-akshamy.kz «Хабар 24»-ке сілтеме жасап.
Бұл туралы Еуропалық комиссия басшысы Урсула фон дер Ляйен мәлімдеді. Оның айтуынша, мұндай шектеу Ресейге қарсы дайындалып жатқан санкциялардың бесінші пакетіне кіреді. Бұдан бөлек, Фон дер Ляйен жеке тұлғалар кіретін санкциялық тізімді кеңейтетінін де жеткізді.
- Санкцияның жаңа пакетінде ресейлік көмір импортына тыйым салу қарастырылған. Оның ішінде ресейдің 4 негізгі банкімен қандай да бір операция жүргізуден бас тарту да бар. Бұдан бөлек, Еуроодақ елдері ресейлік кемелерге одақ порттарына кіруге тыйым салмақ. Дәл сондай тыйым жүк көліктеріне де қатысты. Сонымен қатар Ресейге жартылай өткізгіштер мен көлік құралдарын экспорттау жағын да тоқтатуы көздеп отырмыз, - дейді Еуропалық комиссияның төрағасы Урсула Фон Дер Ляйен.