Белгілі актер әрі аралас жекпе-жек шебері Еркебұлан Тоқтар «Қазақстанның еңбек сіңірген қайраткері» атағын алуына қатысты айтылған сын-пікірлерге түсініктеме берді. Бұл туралы ол журналист Аман Тасығанға берген сұхбатында айтты, деп хабарлайды Aqshamnews.kz тілшісі.
«Атақты неге берген деген сұрақ қойылып жатыр. Неге екенін білмеймін, ол сұрақ маған қойылып жатыр. Оны берген адамға қою керек. «Неге бердің?» деп сұрасын. Ал менен «Неге алдың?» деп сұраса, «маған берді, мен алдым» жауап беремін. Оны жоғары жақтағы адамдар шешті», - дейді актер.
Еркебұлан Тоқтар жұрт ойлағандай ол атақтың материалдық тұрғыдан пайдасы жоқ екенін атап өтті.
«Келіп-кетіп жатқан пайдасы жоқ. Мен жеңілдік алмаймын, мемлекеттен ақша алмаймын. Тегін емделуге болады екен деп естіп қалдым. Мен тегін емделмеймін, өйткені өзімнің дәрігерлерім бар, соларға ақша төлеп жүрмін. Ешқандай жеңілдік қызық емес. Кейбіреулер награда берілген соң үкіметтен ақша алады деп ойлайды. Бір тиын да алмаймын, маған керегі де жоқ. Награда берді, қолын қайтармадым. Өте қуанышты болдым. Оған лайықтымын ба, жоқ па, оны берген адам шешетін шығар. Қалғандары сөйлей береді. Олардың ешқайсының аузын жапқым келмейді. Мен туралы көп айтылғаны жақсы. Жақсы айтсын, жаман айтсын, маңызды емес. Біреуге ұнаймын, біреуге ұнамаймын», - деп түйіндеді ол.
Қазақстан премьер-министрінің орынбасары, мәдениет және ақпарат министрі Аида Балаева 8 желтоқсанда Еркебұлан Тоқтарға «Қазақстанның еңбек сіңірген қайраткері» атағын тапсырған болатын.