2025 жылдың 1 қаңтарынан бастап Қазақстанда онлайн микрокредит рәсімдеу кезінде биометриялық сәйкестендіру мен электрондық цифрлық қолтаңбаны қатар қолдану міндетті болады, деп хабарлайды aqshamnews.kz.
Бұл туралы Ұлттық банк төрағасы Тимур Сүлейменов депутаттық сауалға жауап ретінде мәлімдеді. Оның айтуынша, микроқаржылық ұйымдар ақша аударымын жасау алдында клиенттің банктік шоты немесе төлем картасының оған тиесілі екенін анықтауы керек.
Жалпы, банктер мен микроқаржылық ұйымдарға кемінде екі тексеру әдісін – биометрия мен ЭЦҚ қолдану талап етіледі. Сонымен қатар, банктер төлемдер мен аударымдар жасаған кезде клиентке оның ұялы нөміріне тексеру кодын жіберуді қамтамасыз етеді.
Ұлттық банк онлайн-кредит рәсімдеу кезінде өтінімді мақұлдауды кем дегенде келесі күні жүргізуді ұсынады, бұл "салқындату" кезеңін енгізеді, осылайша клиентке алаяқтар тарапынан мәжбүрленген кредиттен бас тарту мүмкіндігі беріледі. Ұлттық банк басшысы азаматтардың несие алудан өз еркімен бас тарту құқығы бар екенін еске салды. Қазіргі таңда бұл мүмкіндікті шамамен 700 мың қазақстандық пайдаланды.