Бүгінде еліміздегі өзекті мәселелердің бірі – кәсіби жұмысшы мамандарды даярлау. Бұл бағытта атқарылып жатқан жұмыстар баршылық. Бұрынғы техникум, кәсіби-техникалық училищелер колледждерге айналып, оқу орындары түрлі жұмысшы мамандықтарын дайындайды. Мемлекет өз тарапынан оларға барынша жағдай жасауға тырысуда. Қазақстанның барлық аймағында кәсіби жұмысшылар дайындайтын колледждердің жұмысы жандандырылуда. Ендігі мәселе сұранысқа ие мамандарды дайындап, өндірістердегі жұмыс орнын толтыру. Қазір шағын және орташа бизнес секторында өндіріс өріс алып, тәжірибеден өткен маман-жұмысшыларға сұраныс артып отыр. Осы бағытты дамыту колледждерге міндеттелген кезек күттірмейтін мәселе.
Теория мен тәжірибе алаңы
Алматы электр-механика колледжінің басым бағыты – жұмысшы мамандарын дайындау, еңбек адамының мәртебесін арттыру. Оқу орны директорының міндетін атқарушы Ажар Байділдаеваның айтуынша, алғашында «Кәсіптік оқыту орталығы», кейіннен Алматы қаласы Білім басқармасы КМҚК «Алматы электр- механика колледжі» болып құрылған екен.
Бүгінде колледжде 102 қызметкер жұмыс істейді, 860 білім алушы бар. Колледж оқушыларды 9 және 11-сыныптан кейін мемлекеттік тапсырыс бойынша оқуға қабылдап, кәсіби мамандар дайындайды. Білім алушылар үлгеріміне қарай шәкіртақы алады. Әлеуметтік көмек ретінде ыстық тамақпен қамтылған. Шәкірттерге елуден астам өндірістік оқу шеберлері, оның ішінде ғылым кандидаттары, магистрлар, педагог-зерттеуші, педагог- модераторлор дәріс береді. Теория міндетті түрде өндірістік тәжірибемен ұштастырыла жүргізіледі.
Білім ордасының өз оқу-өндірістік шеберханасы бар. Студенттердің тәжірибеден өтуі, оқу орнын бітірген бойда кәсібі бойынша жұмысқа орналасуы үшін Алматыдағы барлық дерлік өндіріс орындарымен келісімдер жасалынған. Олардың қатарында «Сайман» корпорациясы ЖШС, «Алматы электр-механика зауыты», «Алатау Жарық Компаниясы» АҚ, «Алматы жылу желілері» ЖШС, «АлматыЭнергосбыт» МКК, «Алматы Су» МКК, «Іскер Газ» ЖШС және т.б. бар. Өндіріс орындарындағы тәлімгерлерді ынталандыру мақсатында тәжірибеден өткен әрбір студент үшін төлем қарастырылған.
Шетелдік тағылымдама: халықаралық тәжірибені меңгеру
Алматы қаласының білім беру жүйесін дамытудың 2023–2030 жылдарға арналған Жол картасы негізінде шетелдегі оқу-өндірістік базасында 18 қызметкер халықаралық тағылымдамадан өткен. 2023 жылы 2 арнайы пән оқытушысы – Бразилияда, 2 арнайы пән оқытушысы, 3 оқыту шебері – Германияда тағылымдамадан өткен. 2024 жылы оқытушылар Венгрияда, Словенияда, Австрияда, Германияда тағылымдамадан өтіпті.
2023-2024 оқу жылынан бастап Алматы электр-механика колледжі Германияның Магдебург қаласындағы «Janser Consult GmbH» көпсалалы косалтингтік компаниясымен ынтымақтастық орнатыпты. Осы ынтымақтастық аясында 2024 жылдың қыркүйек айында Германияның бірнеше жетекші компанияларымен меморандумға қол қойылып, халықаралық өзара ықпалдастықты дамыту басталды. Серіктестік мақсаты – шетелдермен байланыс орнату, заманауи технологияларды игеру, кәсіби біліктілікті арттыру және халықаралық стандарттарға сәйкес білім беру.
Осының негізінде шетелде тағылымдамадан өтуге барлығы жиырма білім алушы іріктеліп, шетелдік компаниялармен келісім-шарт жасалған. Олар 2025 жылдың басында Германияда 45 күндік тәжірибеден өтіп келді. Жатын орындары тегін болды және оларға 1500–1700 евро көлемінде шәкіртақы төленген. Алматылық шәкірттер шетелдік тағылымдамадан өте жақсы өтіп, тоғыз білім алушы «AMP LEUNA GmbH SITEX Textile», «Hans Kupfer Sohn GmbH», «Actmemium Gegelec Mitte GmbH», т.б. компанияларға жолдама алыпты. Бұл дегеніңіз, Қазақстанның кәсіптік білім беру саласы халықаралық деңгейге шықты деген сөз. Қарапайым еңбек адамының кәсіби жұмысшы мамандығын игерудегі жетістігін осы тәжірибеден көруге болар.