Желтоқсан айының басынан бері еліміздің өңірлерінде 250-ден астам ауыл шаруашылығы жәрмеңкесі ұйымдастырылып, оған миллионға жуық азамат қатысты, деп хабарлайды aqshamnews.kz
Бұл туралы негізгі азық-түлік өнімдерінің бағасын тұрақтандыру жөніндегі кеңесте вице-премьер Серік Жұманғариннің төрағалығымен өткен жиында мәлімделді. Сауда және интеграция бірінші вице-министрі Айжан Бижанованың айтуынша, жәрмеңкелер тұрғындар арасында үлкен сұранысқа ие болып, ұсынылған өнімдер толықтай сатылып жатыр.
«Ең көп сатылған өнімдердің қатарында картоп көш бастап тұр: Қарағанды облысында – 110 тонна, Алматыда – 90 тонна, ал Шымкентте мерекелік демалыс күндері 45 тонна картоп сатылды», – деді бірінші вице-министр.
Сонымен қатар, жәрмеңкелермен бірге сауда сөрелеріне тұрақтандыру қорларынан көкөністер шығарылып жатыр. Ауыл шаруашылығы вице-министрі Ермек Кенжеханұлының дерегінше, 19 желтоқсан күнгі мәлімет бойынша, тұрақтандыру қорларынан 9,2 тонна картоп, 2,6 тонна сәбіз, 2,8 тонна пияз және 2,1 тонна қырыққабат сатылған. Алдағы мамыр айына дейін көкөністерді сату кестесі өңірлердің қажеттілігін ескере отырып жасалды.
Апта қорытындысы бойынша әлеуметтік маңызы бар азық-түлік өнімдерінің бағасы 0,1%-ға өсті, ал жыл басынан бері бұл көрсеткіш 1,1%-ды құрады.
Кеңес соңында Серік Жұманғарин жәрмеңкелерді одан әрі белсенді өткізуді және мереке қарсаңында бағаның негізсіз өсуіне жол бермеу үшін сауда саласында мемлекеттік бақылауды күшейтуді тапсырды.