Елімізде теміржолды белгіленбеген жерлерден кесіп өткен 28 мыңнан астам азамат әкімшілік жауапкершілікке тартылды. Бұл туралы көліктегі полиция департаменті хабарлады.
Жыл басынан бері теміржолды рұқсат етілмеген жерлерден кесіп өткен 28 589 адамға әкімшілік жаза қолданылған, оның ішінде адамдардың және жануарлардың қатысуымен болған 1 161 оқиға тіркелді. Өкінішке орай, 55 азамат пойыз астына түсіп, олардың жартысынан көбі қайтыс болды.
Көліктегі полиция департаментінің бастығы Бақытжан Малыбаевтың айтуынша, демалыс күндері Жетісу облысында жүк пойызы белгіленбеген жерден теміржолды кесіп өтіп бара жатқан ер адамды қағып кетіп, ол алған жарақаттарынан сол жерде қайтыс болған. Қазіргі таңда осы оқиғаға байланысты қылмыстық іс қозғалып, тергеу амалдары жүргізілуде.
Малыбаевтың айтуынша, теміржолдағы қайғылы оқиғалардың көпшілігі азаматтардың теміржолда жүріп-тұру ережелерін сақтамауы салдарынан орын алады. Ол адамдарды теміржолдың қауіпті аймақ екенін түсінуге шақырады.
Көлік полицейлері профилактикалық іс-шаралар барысында азаматтарға теміржол аймағында қауіпсіздік ережелерін қатаң сақтаудың маңыздылығын ескертіп отырады. Теміржол төсемінен өтпес бұрын пойыздың немесе вагондардың жоқтығына көз жеткізу, сондай-ақ, сигналды есту үшін құлаққап пен бас киімді шешу қажеттілігі жиі айтылады.