Кейде ауыр жұмыс аптасынан кейін, басшылықпен болған келіспеушіліктен соң немесе демалыстан қайта оралғанда "жұмыстан кетемін"деген ой жиі айтылады. Алайда бұл ойды нақты әрекетке айналдыруға көп адам тәуекел ете бермейді. Көбіне бәрі сөз жүзінде немесе ішкі уәдемен ғана шектеледі. Бұл сөздің астарында не жатыр? Мәселенің мәнін Aqshamnews.kz тілшісі анықтап көрді.
Пирогов университетінің маманы Вера Никишинаның айтуынша, жұмыстан кету туралы ой мен нақты шешім қабылдау – мүлде екі бөлек нәрсе. Адамдар кей жағдайда "кетемін" деген сөзді өзін-өзі алдау немесе ішкі наразылықты уақытша басу үшін қолдануы мүмкін. Яғни, шын мәнінде олар жұмыстан кетуге дайын болмайды.
Маман жұмыс орнын ауыстыру туралы шешім эмоцияға негізделмеуі керегін айтады. Мұндай маңызды қадам демалыстан кейінгі күйзеліс пен мерекелік күндерден соңғы жалқаулыққа немесе бір реттік жанжалға байланысты қабылданбауы тиіс. Керісінше, адам өз жұмысын салқынқанды бағалап, оның барлық артықшылықтары мен кемшіліктерін таразылап, нақты не нәрсе қанағаттандырмайтынын және жұмыс орнын ауыстыру қандай салдарға әкелуі мүмкін екенін түсінуі қажет.
Көп жағдайда жұмыстан кеткісі келетіндей көрінетін ниеттің артында шынайы себеп жатады. Демалыс пен мереке күндері адамға кәсіби күйзелістен алыстап, тынығуға мүмкіндік береді. Алайда қайтадан жұмыс ырғағына оралу көпшілікке оңай соқпайды. Осы ішкі қарсылық пен шаршау сезімі кейде "жұмыстан кетемін" деген оймен бүркемеленуі мүмкін.
Сондықтан мамандар маңызды шешім қабылдамас бұрын өз басымдықтарыңызды айқындап, эмоция басылған соң ғана нақты қадам жасауға кеңес береді.