Алматыда тағы да қайғылы жағдай орын алды. Алматыда жарнама ілетін 26 жастағы альпинист 12-қабаттан 2-қабаттың балконына құлап, оқиға орнында көз жұмды.
Оқыс оқиға 3 желтоқсан күні түстен кейін болды. «ДДК-экстрим групп» ЖК өнеркәсіптік альпинисі Төле би көшесіндегі 16 қабатты «Assem Plaza» тұрғын үй кешенінің қасбетіне жарнамалық баннер орнатқан, деп хабарлайды aqshamnews.kz.
Оқиғаға қатысты Полиция департаменті түсініктеме берді.
«Алмалы аудандық ПБ-ға қарасты полиция бөлімі 27 жастағы жігіттің өліміне әкеп соқтырған еңбек қауіпсіздігі ережелерін бұзу дерегі бойынша қылмыстық іс қозғады. Оқиғаның басқа да мән-жайларын анықтауға бағытталған тергеу шаралары кешені жүргізіліп жатыр», - делінген хабарламада.
Еске сала кетейік, бірер күн бұрын Алматыда қоймалардың бірінде дәнекерлеу жұмыстарын жүргізу кезінде оқыс жағдай болып, жұмысшы қайтыс болған еді. Қауіпсіздікті сақтаңыздар!