Оның қолынан шыққан бірегей бұйымдары өзге елдерде де жоғары бағаға ие.
Алматы облысының тұрғыны 34 жасар Ертай Өміртаев ежелгі ұлттық өнерді дамытуда, деп хабарлайды Almaty-akshamy.kz.
«Ұлттық музыкалық аспаптар, тұрмыстық заттар мен ағаштан жасалған бірегей бұйымдар жасау – дарынды шебердің талантының бір қыры ғана. Бүгінде жастарды ұлттық өнерге үйретіп жатыр. Оның қолынан шыққан сәндік әшекейлер мен қолданбалы өнердің бірегей бұйымдары тек Қазақстанда ғана емес, жақын шетел мемлекеттерінде де жоғары бағаға ие»,– делінген Алматы облысы әкімдігінің баспасөз қызметінің хабарламасында.
Бүгінде жас қолөнерші негізгі тұрмыстық заттарды да, түпнұсқа мүсіншелер мен панно-картиналарды да жасайды. Мұнда суретшінің шеберлігінің көмегі зор. Ертай қолөнермен қатар кескіндемені де ұмытпауға тырысады. Ал ұрпақтар мен дәстүрлер сабақтастығын бейнелейтін «Жеті ата шежіре» ағаш картиналары Ертайдың өзіндік брендіне айналған.
«Ата-бабамыз ұрпақтан-ұрпаққа ежелгі өнерді үйретіп отырған. Соның арқасында біз осы қасиетті өнерді игеріп келеміз. Бұған ұлттық музыкалық аспаптарды тұтас ағаштан ойып жасау жатады. Менің ата-бабаларымның арасында қолөнершілер де болды. Сондықтан мен өз шеберханамды «Баба жолы» деп атадым. Содан кейін ғана ағаштан панно-картиналарын жасау идеясы келді», – дейді шебер.
Ертай Өміртаевтың шығармашылығында домбыра ерекше орын алады. Оның шеберханасында жылына 50-ден 80 данаға дейін музыкалық аспаптар жасалады. Бұл домбыра, қобыз, жетіген, сазген, дауылпаз және т.б. Түркі халықтарының түрлі музыкалық аспаптарының 45 түрі бар. Оның өнімдерін Қазақстанда да, Ресейде де, Қырғызстанда да, Өзбекстанда да кездестіруге болады. Ертай Өміртаевтың жетістіктері - қазақстандық «Шебер-2017» қолөнершілер байқауынан «Жаңашылдығы үшін» дипломы, дарынды жастар арасындағы «Көшбасшы-2016» облыстық байқауына мүсін жасағаны үшін І орын. Өткен жылы ол әлемнің жас суретшілер одағының мүшесі болды. Ертай Өміртаев Абай Құнанбаевтың 175 жылдығына орай жазған Абайдың портреті әлемнің жас суретшілер одағы шығарған кітаптың мұқабасында бейнеленген.