41 жастағы ер адамды аман алып қалу мүмкін болмады.
2023 жылы 23 қаңтарда Жетісу облысы Қаратал ауданында трактор мен тауар тиеген пойыз соқтығысты. Жол апаты салдарынан екі адам зардап шекті, оның бірі ауруханада көз жұмды, деп хабарлайды Almaty-akshamy.kz.
Облыстық полиция департаменті жол апаты Қанабек ауылындағы теміржол өткелінде орын алғанын нақтылайды.
"Тауар тасуға арналған пойыз тракторды қағып кеткен. Оқиға орнынан аудандық ауруханаға екі адам жеткізілді, дәрігерлер қанша жантасқанымен олардың бірі - 41 жастағы ер адамды аман алып қалу мүмкін болмады. Екінші жарақат алған 18 жастағы жігіт медициналық тексеруден өткізіліп жатыр. Екеуі де трактор салонында болған", - деді Жетісу облысы ПД баспасөз қызметі.
Оқиға орнында полиция қызметкерлері жұмыс істеп жатыр.
Аталған фактіге сәйкес, ҚР ҚК 345-бабы бойынша сотқа дейінгі тергеу амалдары қолға алынды.