Ұлы Жеңістің 80 жылдығына орай Алматы қаласының Жетісу ауданына қарасты №129 ЖББ мекемесінің ұйымшыл ұжымы жылдағы қалыптасқан дәстүр бойынша бірқатар қарт майдангерлер мен тыл ардагерлерін мектепке шақырып мерекелік концерт ұйымдастырды.
Іс-шараның мақсаты – Отанын қорғаған батыр бабаларымыздың ерлігін дәріптей отырып, өскелең ұрпақты өз елін, жерін сүюге Қазақ елінің майданда және тылда көрсеткен ерен ерлігін құрметтеуге, елжандылыққа тәрбиелеу.
Мектеп қабырғасында өткен мерекелік кеш барысында сахна төрінде патриоттық әндер шырқалып, соғыс жылдарындағы көріністерді бейнелейтін қойылымдар қойылды. Сонымен қатар, көрме ұйымдастырылып, келушілер назарына соғыс ардагерлерінің өмірі, ерлігі мен тылда еңбек еткен жандардың үлесі жайлы тың деректер мен фотоматериалдар ұсынылды.
Өз кезегінде сол күні сұрапыл соғысты тебірене еске алған ардагерлер батырлардың қайталанбас ерлігін әңгімелеп, оқушылардың жігерін жанитын жігерлі сөздерін тілге тиек етті.
Мектеп директоры Архат Советович ұжымдағы барша ұстаздар қауымын Жеңіс мерекесімен шын жүректен құттықтап, өзінің жүрек жарды жылы лебізін білдірді. Сондай-ақ мектеп басшысы соғыс жылдарындағы ерлігі, еңбекке адалдығы мен қаһармандығы үшін алғыс айтып, зор денсаулық, амандық пен ұзақ ғұмыр тіледі.
«Ұлы Жеңістің 80 жылдығын зор құрметпен және ризашылықпен атап өтудеміз. Бұл жеңісті жақындатқан әрбір жанның алдында тағзым ететін елдіктің, бірліктің рухтың мәңгілік мерекесі. Мемлекет басшысы Қасым-Жомарт Тоқаев атап өткендей, тарихи шындықты сақтау – біздің ұлт алдындағы парызымыз. Батыр бабаларымыздың ерлігі тек өткеннің шежіресі емес, бүгінгі буынның рухани темірқазығы», - дейді бізге берген сұқбатында.
Осылайша бірнеше сағатқа созылған игілікті іс-шара соңында мектеп оқушылары мен құрметті қонақтар және ұстаздар естелікке суретке түсті.