"Қайраттың" бас бапкері Рафаэль Оразбахтин "Пафоспен" өтетін матч алдында ақша емес, нәтиже мен тарих жасау маңызды екенін айтты, - деп хабарлайды aqshamnews.kz тілшісі.
Баспасөз мәслихатында ол команданың басты мақсаты - ел тарихындағы маңызды жетістікке жету екенін ерекше атап өтті.
"Пафосты" жеңгеннен кейінгі жүлде қоры бізді еш қызықтырмайды. Біз тарих жасағымыз келеді. Олай сырттан сөгуге болмайды, ондай айтып жатқандар футболды түсінбейтіндер. Біз ақша үшін емес, шынайы нәтиже үшін ойнаймыз. Чемпиондар лигасында 15 жылдан бері алғаш рет ойнап жатырмыз. Жерге түсіңдерші", - деді Рафаэль Оразбахтин.
Ертең "Қайрат" Чемпиондар лигасы аясындағы екінші кездесуін өз алаңында өткізбек. Бұған дейін алматылықтар әйгілі "Реал Мадридке" қарсы ойнаған болатын. Бұл жолы команда кипрлік "Пафоспен" кездесіп, турнирдегі тарихи нәтижеге қол жеткізуді көздейді.
