Еренғайып Қуатайұлы енді Прага жарты марафонына қатысады.
Былтыр АҚШ-тың Нью-Йорк қаласында алғаш болып отандастарымыздың арасында алты мэйжор марафонды 3 сағат ішінде жүгірген Еренғайып Қуатайұлы Португалияның Лиссабон қаласында өтіп жатқан Lisbon half marathon-2024 марафонына қатысып жатыр, деп хабарлайды Almaty-akshamy.kz
Ол марафонда жүгіріп, мәреге 1 сағат 21 минут 53 секундтта жетті. Өзінің айтуынша, нәтиже жаман емес.
«Кеше мен алты жартыны бастадым. Нәтиже жаман емес: 1:21:53. Lisbon half marathon толық марафоннан кем болған жоқ. Әлемнің әр жерінен 37 500 адам қатысқан сұрапыл жарыс болды. Айтпақшы, жарты марафонның әлемдік рекорды осы Лиссабон жарты марафонының еншісінде. Екі жыл бұрын угандалық желаяқ Киплимо Джейкоб 57:31 нәтижесімен талайдың таңдайын қақтырған болатын. Биыл Лиссабонда күн ыстық болды. Соған байланысты болған шығар, әлем рекорды жаңармақ түгілі, оған бақандай 3 минут жетпей қалды.Қалай болғанда да ұйымдастыру деңгейі мэйжор марафоннан еш кем болған жоқ. Тек публиканың ағылшындар сияқты агрессивті қолдауы жетіспей қалған сияқты. Сонымен, Superhalfs-тың алғашқы медалы қалтада. Алда сәуірде Прага күтіп тұр. Марафон тек далақтап жүгіру емес, оның да философиялық мәні бар. Марафон – жігер. Марафон – тәртіп. Марафон – қайырымдылық. Марафон – саяхат», – деп жазды ол өзінің ФБ парақшасында.