5 қаңтарда Мемлекет басшысы Қасым-Жомарт Тоқаев "Turkistan" газетіне берген сұхбатында әлеуметтік желі адамның ойлау қабілетіне зияны барын айтып, "жасы қырыққа жетсе де, білімі мен ой-өрісі он бес жастағы жасөспірімдер деңгейінде қалып қойған азаматтар" барын атап өтті. Бұған қатысты психологтар не дейді? Толығырақ Аqshamnews.kz материалында.
Психолог Ольга Романивтің айтуынша, әлеуметтік желінің кесірінен өз өмірін қызықсыз деп санайтын адамдарда жіберіп алған мүмкіндіктер синдромы (FOMO) қалыптасады. Бұл күй өзгелерге қызғанышты күшейтеді.
FOMO кезінде адам басқалардың не істеп жүргенін үнемі бақылап, өзін олармен салыстыруға бейім болады, ал бұл өзін-өзі бағалаудың төмендеуіне әкелуі ықтимал. Психолог бұл синдром, мысалы, адам достарының кештен не сапардан салған фотоларын көргенде өршуі мүмкін екенін түсіндіреді: әлеуметтік желіде көпшілік күнделікті қарапайым сәттерді емес, өмірінің "ең мінсіз келбетін" ғана көрсетеді. Соның салдарынан интернеттен біреудің тек жақсы қырларын көрген басқа адамдар өз өміріне көңілі толмай, түңіліп кетуі мүмкін.
Егер адам желідегі өзгенің өмірін бақылағанда қызғаныш пен жайсыздық тудыратынын түсінсе, виртуаы әлемде өткізетін уақытын қысқартқаны жөн. Балама ретінде тым көп мақтанатын адамдарға жазылудан бас тартуға болады. Сондай-ақ, қуаныш сыйлайтын дүниелер туралы, мысалы, күнделікке жазып жүру назарды өз ішкі сезімдеріне бұруға көмектеседі.
Психолог бар нәрсенің қадірін білу маңызды дейді: үй, денсаулық, отбасы сияқты құндылықтарды бағалау қажет. Кейде табыс пен қызық қуған асығыстықты бәсеңдетіп, болып жатқан сәтті толық сезініп, өмірді тереңірек "тұшып" көру әлдеқайда дұрыс.
"Баяулаудың жақсы тәсілі - саналы зейін (майндфулнес): қазіргі сәтте өзіңе, сезімдеріңе және әрекеттеріңе назар аудару. Бұл шай дайындау немесе асықпай тамақтанып, оның дәмін сезіну сияқты қарапайым әдеттерден басталады", - деп түйіндейді ол.