Алматы жастары алдағы референдумды пікірсайыс арқылы талқылады.
«Тұран» университетінде Конституцияға енгізілетін түзетулерге байланысты азаматтардың өмірінің өзгеруін түсіндіру мәселелеріне арналған «Конституция бойынша азаматтардың өмірі» тақырыбында пікірсайыс өтті. Пікірталас ЖОО қабырғасында офлайн және онлайн форматта болды.
"Университетіміздің белсенді жастары өз бастамасымен референдумды талқылау үшін пікірсайыс өткізуде. Негізгі тақырып – «Конституция бойынша азаматтардың өмірі». Пікірталас ЛД (Линкольн-Дуглас) форматында өтті. Яғни студенттеріміз бір-бірден екі тарапқа бөлініп, референдумнан кейін Қазақстан азаматтары өмірлерінің өзгеретіні туралы ойларымен бөлісті", – деді Жастар ісі жөніндегі комитет басшысы Мансұр Әлімов.
Пікірсайыстан кейін айтылған ойлар «Дөңгелек үстел» басында талқыланды. Жалпы, шараға ЖОО-ның ең белсенді студенттері мен ішкі ұйымдардың басшылары қатысты.
"Референдум – бұл жаңа өмірге қадам. Бүгінгі «Дөңгелек үстел» мен пікірталас барысында студенттеріміз осындай ойға келді. Сондай-ақ, 5 маусым күні бәрінің дауыс беріп, бұл маңызды мемлекеттік бастаманы қолдайтындарын айтты", – деді Мансұр Әлімов.