Алматы қаласы, Алматы және Жетісу облыстары бойынша қылмыстық-атқару жүйесі департаментіне қарасты №11 мекемесінде «Нельсон Мандела» күніне орай «Азаптауларға және басқа да қатыгез, адамгершілікке жатпайтын немесе ар-намысты қорлайтын іс-әрекеттер мен жазалау түрлеріне қарсы конвенция» туралы дәріс өтті, деп хабарлайды аlmaty-akshamy.kz.
Халықаралық Нельсон Мандела күнін БҰҰ Бас ассамблеясы 2009 жылдың қарашасында бекіткен. Жыл сайын 18 шілдеде Оңтүстік Африкадағы апартеидке (нәсілдік кемсітушілік) қарсы ең танымал күрескерлердің бірінің туған күнінде атап өтіледі. Халықаралық мерекелер күнтізбесінде бұл күн Африканың бұрынғы президентінің бейбітшілік пен бостандыққа қосқан үлесін мойындау үшін пайда болған.
№11 мекемесіндегі САӘПТЖБ карантин бөлімінің бастығы әділет лейтенанты Дамир Еркешев колонияда жазасын өтеп жатқан жасөспірімдерге осы күннің мән-мағынасы түсіндірілгенін айтты. Бас бостандығынан айырылған балалар іс-шара барысында «Нельсон Манделлаға» күніне арнап сурет салып, қабырға газетіне өздерінің жүрекжарды тілектерін жазды.
– Бізде осындай іс-шаралар жоспарға сәйкес жиі өткізіліп тұрады. Сол арқылы қазіргі жасөспірімдер арасында құқық бұзушылықтың алдын алуға, қылмыстың өсуіне, қатыгездікке жол бермеуге үлес қосып, жастарды адамгершілікке жатпайтын немесе ар-намысты қорлайтын іс-әрекеттерден аулақ болуға шақырып отырамыз, – дейді САӘПТЖБ бастығының міндетін уақытша атқарушы әділет капитаны Бекзат Жақанов.