Маңғыстауда жасанды интеллект технологияларына арналған семинар өтті, - деп хабарлайды Aqshamnews.kz.
Маңғыстауда облыс әкімдігінің ұйымдастыруымен жасанды интеллект технологияларын қолдану бойынша тренинг өтті, деп хабарлайды Қоғамдық коммуникация орталығы.
Тренинг барысында қатысушыларға жасанды интеллект технологияларын қолдану жолдары мен жасанды интеллект түрлері түсіндірілді. Сондай-ақ шара аясында журналист, «AI hub» компаниясының өкілі Мейіржан Әуелханұлының «Жасанды интеллект әліппесі» атты кітабының таныстырылымы өтті. Кітапта жасанды интеллектіні өмірдің әр саласында дұрыс пайдалану жолдары мен олардың түрлері көрсетілген. Сонымен қатар, қосымша жасанды интеллектіге дұрыс сауал қоюға арналған промпттар берілген. Спикер өз сөзінде жасанды интеллект мүмкіндіктерін жұмыс барысында тиімді қолдану жолдарын атап өтті.
- Қазіргі таңда жасанды интеллект – ең алдымен үлкен мүмкіндік. Бұл құралды өздерінің күнделікті жұмысында тиімді қолдана алады. Жасанды интеллектіні тек мәтін түзететін редактор ретінде емес, бейнематериалдар мен суреттер жасау, зерттеу жүргізу, үлкен деректермен жұмыс істеу сияқты бағыттарда да кеңінен қолдануға болады. Сондай-ақ, жасанды интеллект деген ұғым «промпт» деген сөзбен тікелей байланысты. Егер сіз жасанды интеллектіге дұрыс сауал жолдай алсаңыз, оның барлық мүмкіндіктерін дұрыс пайдалана аласыз. Егер дұрыс құрылымда сауал жолдай алмасаңыз, сол сауалға сай дұрыс жауап бермеуі мүмкін. Сондықтан, сауалдың дұрыс қойылуы ең басты әрі, маңызды мәселе,- деді Мейіржан Әуелханұлы.