31 наурыз күні Мақан Есболатов атындағы ҚР ІІМ Алматы академиясында елге белгілі спорт саңлақтарының қатысуымен «дөңгелек үстел» өтті. Жиында Ұлттық Құрылтайдың IV отырысындағы айтылған негізгі мәселелер басты тақырып ретінде талқыланды.
Мемлекет басшысының қатысуымен өткен Ұлттық Құрылтайдың төртінші отырысында Қазақстанды дамытудың негізгі бағыттары талқыланып, жаңа бастамалар ортаға салынғаны мәлім. Кешегі «дөңгелек үстел» барысында қатысушылар Ұлттық Құрылтайда айтылған білім беру мен тәрбиеге қатысты мазмұндарды ашалай талдады.
Талқы жиынына Қазақстан халқы Ассамблеясының Ақсақалдар кеңесінің өкілдері, Қазақстан Республикасының еңбек сіңірген спорт шебері Қанат Ислам, Олимпиадының қола жүлдегері, үш дүркін әлем чемпионы Назым Қызайбай, әлем чемпионы Алуа Балқыбекова арнайы шақырылды. Даңқты спортшылар академия курсанттарымен кездесіп, өз ойларымен бөлісті, әрі сұрақтарына жауап берді.
– Ұлттық Құрылтайдың кезекті отырысында Мемлекет басшысы өскелең ұрпаққа білім беру және тәрбие мәселесіне де ерекше тоқталды. Білім беру мен тәрбие бір-бірінен ажырмас ұғымдар екенін ескерсек, білім сапасын арттырумен қатар тәрбие мәселесіне де баса назар аударымыз керек. Жас ұрпақтың бойына ұлттық құндылықтарды сіңіріп, оларды жауапкершілік пен еңбексүйгіштікке баулу өте маңызды. Бұл мақсатта «Адал азамат» және «Бір тұтас тәрбие» бағдарламасы жүзеге асырылып жатқанын жақсы білесіздер. Осы бағдарламалар аясында отбасылық тәрбиемен қатар жастардың қоғамдық белсенділігін арттыру қолға алынып жатыр, – деді ҚР ІІМ Алматы академиясы бастығының орынбасары Мұрат Жақыпбеков.
Ал Қазақстан халқы Ассамблеясының Ақсақалдар кеңесінің мүшесі Абдухалил Долкунтай ел бірлігі ең маңызды мәселе екенін атап өтті.
– Президент болашақ жастардың қолында екенін айтты. Сондықтан жастарымызды дұрыс тәрбиелеп, еліміздің өркениетті, қуатты мемлекет болуына әрқайсысымыздың атсалысуымыз маңызды. Қазақстанда 100-ден астам ұлт өкілдері өмір сүріп жатыр. Біз тату- тәтті болсақ, дамыған мемлекеттердің қатарына емін- еркін қосыламыз. «Жұмыла көтерген жүк жеңіл», – деді ол.
Қазақстан Республикасының еңбек сіңірген спорт шебері Қанат Ислам курсанттарға өмір мен жұмыстағы тәртіптің маңызына баса тоқталды. Сондай-ақ, академия курсттарының болашақ қызметі абыройлы әрі жауапкершілігі жоғары екенін атап өтті. Ал әлем чемпионы Алуа Балқыбекова әр адам өз мамандығының шебері болса, үлкен жетістікке жететінін түсіндірді. Олимпиадының қола жүлдегері, үш дүркін әлем чемпионы Назым Қызайбай спорттың адам өміріндегі маңыздылығына тоқталды.
– Бәріңізді спортпен айналысуға шақырамын. Еліміздің өсіп, дамуына өз үлесімізді қосайық. Елім дейтін, жерім дейтін көздерінде от, сөздерінде жалыны бар азаматтарымыз көп болсын, – деді Назым Қызайбай.