Алматыда «Қалалық білім берудегі жаңа технологиялардың ғылыми-әдістемелік орталығының» ұйтқы болуымен жас педагогтердің «Жас келсе іске...» атты слеті өтті. Жалпы, бұл слет 2019 жылдан бері өткізіліп келеді. Бұған қоса, аталмыш орталық жанынан ашылған қаламыздағы «Жас педагогтер мектебі» де өз жұмысын жандандырып, «Өз жұлдызыңды жақ» деп аталатын қалалық байқауды өткізуді дәстүрге айналдырып отыр. Бұл байқаудың ерекшелігі жеңімпаз болған жас маман «Жаңа мектепке – жаңашыл ұстаз» атты республикалық байқауға қатыса алады.
Сонымен, кезекті V слет Алатау аудандық Оқушылардың инновациялық шығармашылық орталығында өтіп, оған 600-ден аса мектепке дейінгі мекеме, орта білім беру ұйымдарынан және колледждердің педагогикалық 3 жылға дейінгі өтілі бар жас мамандары қатысты.
Слет барысында жас мамандар өзара тәжірибе алмасып, шеберлік сыныптарына қатысты. Сонымен қатар, «Өз жұлдызыңды жақ-2024» байқауының 21 жеңімпазы мен олардың тәлімгерлері Білім басқармасының, қалалық «Ұстаз» жергілікті кәсіптік одағының Алғыс хаттарымен марапатталды.