Денсаулық сақтау министрлігі Марбург вирусының таралуына байланысты эпидемиологиялық бақылауды күшейтті
ҚР Бас мемлекеттік санитариялық дәрігері Сархат Бейсенованың айтуынша, Денсаулық сақтау министрлігі Дүниежүзілік денсаулық сақтау ұйымының жаңа қауіпті инфекция — Марбург вирусының өршуі туралы ескертуіне байланысты бақылау шараларын күшейтуде.
Марбург вирусы — адамдар мен приматтарға әсер ететін сирек кездесетін, ауыр вирустық геморрагиялық қызба. Бұл вирус жарқанаттарда кездесіп, олардан адамдарға берілуі мүмкін.
Марбург қызбасының табиғи ошақтары
Бұл ауру Оңтүстік, Батыс және Орталық Африка елдерінде, атап айтқанда, Оңтүстік Африка Республикасы, Габон, Судан, Конго Демократиялық Республикасы, Либерия, Гвинея, Зимбабве, Кенияда кездеседі. Аурудың белгілері вирусты жұқтырғаннан кейін 2-21 күн ішінде пайда болады.
Денсаулық сақтау министрлігі профилактика шараларын сақтауды ұсынады
Халықтың жоғары көші-қонын ескере отырып, Қазақстан Денсаулық сақтау министрлігі қазақстандықтарға эндемиялық аймақтарға барған кезде келесі сақтық шараларын орындауды ұсынады:
1. Жұқтырған адамдармен байланыста болудан аулақ болу.
2. Африка джунглиінде кездесетін жабайы жануарлардан сақ болу.
3. Жергілікті жануарлардың нашар қуырылған етін тұтынбау.
4. Вирустың асимптоматикалық тасымалдаушысы болып табылатын мысырлық жарқанаттар мекендейтін үңгірлер мен шахталарға бармау.
5. Ауру белгілері пайда болған кезде дереу медициналық көмекке жүгіну.
6. Жеке гигиена ережелерін қатаң сақтау.
Марбург вирусы неге қауіпті?
Марбург вирусына қарсы арнайы ем немесе вакцина жоқ. Тек симптоматикалық емдеу ғана жүргізіледі.
Бұл вирус адамға тікелей байланыс арқылы беріледі. Вирусты зақымдалған тері немесе шырышты қабық арқылы жұқтыруға болады. Сондай-ақ вируспен зақымдалған заттарға тигенде, науқастың төсек-орны немесе киімін ұстаған кезде жұқтыру қаупі бар.
Аурудың негізгі белгілері: қызба, тамақ ауруы, бөртпе, іштің ауыруы, мұрын мен көзден қан ағу.
Марбург вирусының таралу қаупіне байланысты шектеу шаралары қабылданады ма?
Сархат Бейсенова Денсаулық сақтау министрлігі Марбург вирусының эпидемиологиялық жағдайын мұқият қадағалайтынын атап өтті. Аурудың республикаға әкелінуіне және таралуына жол бермеу мақсатында халықаралық әуежайларда және мемлекеттік шекарада барлық келетін жолаушылардың байланыссыз термометриясы жүргізіліп, санитариялық-карантиндік бақылау жүзеге асырылуда.