Алматыда қала көріктендіру мен көгалдандыру жұмыстарына бөлінетін қаражат 2024 жылғы 121,6 млрд теңгеден 2025 жылы 170,5 млрд теңгеге дейін 40%-ға көбейеді. Бұл туралы Орталық коммуникациялар қызметінде өткен брифингте Алматы қаласының әкімі Ерболат Досаев мәлімдеді, деп хабарлайды aqshamnews.kz
«Көріктендіру мен көгалдандыру – жайлы қалалық орта құру мен тұрғындардың өмір сапасын арттырудың негізгі құрамдас бөліктері. Осыған байланысты Мемлекет басшысы бастамашылық еткен «Таза Қазақстан» акциясы экологияны жақсартуға және қоршаған ортаға ұқыпты қарауға бағытталған», – деді Ерболат Досаев.
2023 жылдың қаңтар айынан бастап Алматы әкімдігі жаңа жасыл желектерді қорғау және күту ережелерін енгізуді белсенді түрде қолға алды. Ал биылғы шілде айында жайлы қалалық ортаны қамтамасыз ету мақсатында Алматы қаласын көріктендірудің жаңа ережелері қабылданды.
Айта кетейік, жаңа көріктендіру ережелері «Таза Қазақстан» республикалық акциясының идеясына негізделген және елді мекендердің аумағын көріктендірудің республикалық үлгілік ережелеріне сәйкес әзірленген.
Жасыл екпелерді қорғау және күту ережелері Мемлекет басшысының Алматыда жаңа рекреациялық аймақтар құру және көгалдандыру жөніндегі тапсырмасын орындау аясында қабылданды. Бұл ретте, жаңа көшеттерге қойылатын талаптар күшейтіліп, жасыл екпелерді күту және қорғау нормалары арттырылды, сондай-ақ суару жүйесін орнату міндетті болып бекітілді. Жыл сайын қалада 320 мың ағаш пен бұта отырғызу жоспарлануда. 2023-2024 жылдары 500 шақырым автосуару және тамшылатып суару желілері орнатылды. Ал 2025 жылы тағы 290 шақырым желі орнатылып, миллионнан астам ағашты автосуару жүйесімен қамту жоспарланған.
Естеріңізге сала кетейік, Алматыда аулаларды кешенді күтіп ұстауға арналған үш жылдық келісімшарттар енгізілген. Олар санитарлық тазарту, көріктендіру элементтерін жөндеу және жасыл аймақтарды күту жұмыстарын қамтиды. Сонымен қатар, магистральдық көшелер бойындағы үйлердің қасбетін жөндеуге қатысты тәсілдер қайта қаралды.